კრწანისის რაიონში, ზემო ფონიჭალაში, ჟორდანიას ქუჩაზე ადგილობრივ მოსახლეობას უკვე ერთი წელია საკანალიზაციო ქსელის და საგზაო ინფრასტრუქტურის პრობლემა აწუხებს. მათ არაერთხელ მიმართეს რაიონულ გამგეობას, რასაც არანაირი რეაგირება არ მოჰყოლია. დღეს ზემო ფონიჭალის მოსახლეობის მოთხოვნით, ადგილზე „ერთიანი ნაციონალური მოძრაობის“ კრწანისის რაიონის მაჟორიტარი დეპუტატობის კანდიდატი იმყოფებოდა და მათ პრობლემებს გაეცნო. ირაკლი აბესაძის თქმით, პრობლემის მოუგვარებლობა ხელისუფლების უყურადღებობის, არაკვალიფიციურობისა და ხშირ შემთხვევაში კორუფციული ინტერესების არსებობის ბრალია. მაჟორიტარი დეპუტატობის კანდიდატი მოსახლეობას, პრობლემის მოგვარებას საკუთარი უფლებამოსილების ფარგლებში დაპირდა.
შეხვედრის დაწყების შემდგომ ადგილზე ადგილობრივი ხელისუფლების წარმომადგენლები მივიდნენ, რომლებსაც ადგილობრივი მოსახლეობა მათი უმოქმედობის გამო დაუპირისპირდა.