"კირბალის მკვიდრის გატაცების მცდელობა არ მოხერხდა, მაგრამ ამ ადამიანს მიაყენეს ფიზიკური შეურაცხყოფა. ეს არის ღია და თავხედური პროვოკაცია. 2008 წლიდან მოყოლებული ჩვენ სისტემატურად ვაწყდებით ადამიანის უფლებების ძალიან უხეშ დარღვევებს, ღირსების შელახვას, შეურაცხყოფას საოკუპაციო ხაზის სიახლოვეს მცხოვრები ადამიანებისას, ან როგორც მინიმუმ, მათი თავისუფალი მიმოსვლის შეფერხებას. ეს არის უკანონობა. ამის თაობაზე გვქონდა კომუნიკაცია ჩვენს პარტნიორებთანაც. საქმის კურსში ჩავაყენეთ ევროკავშირის მონიტორინგის მისია, რათა მათ შესაბამისად მოახდინონ გარემოებების დადგენა და შემდგომ რეაგირება. ერგნეთში "ინციდენტების პრევენციისა და მათზე რეაგირების მექანიზმის" მორიგ შეხვედრაზე ეს საკითხი ცალკე იქნება დასმული ქართული მხარის მიერ...ჩვენ რასაც ვაკეთებთ არის ის, რომ მაქსიმალურად ვცდილობთ მსგავსი შემთხვევების პრევენცია მოვახდინოთ და გვქონდეს ძალიან მკაცრი რეაგირება, ამავდროულად არ მივცეთ არავის საშუალება, რომ ეს ინციდენტები გამოიყენონ რაიმე უფრო დიდი დაძაბულობის პროვოცირებისათვის." - განაცხადა შერიგებისა და სამოქალაქო თანასწორობის საკითხებში სახელმწიფო მინისტრის პირველმა მოადგილემ, ქეთევან ციხელაშვილმა, "სტარვიზიის" ეთერში. უყურეთ "სტარვიზიაზე" და უსმინეთ რადიო star fm-ზე, "აქტუალური თემის" შეკითხვებს ქეთევან ციხელაშვილი პასუხობს.