რამდენიმე დღეა გამწვანების, დეზეფექტის, კომუნალური მეურნეობის სამსახური და კომპანია „დევე+“ ფოლადაურში აქტიურ ინფრასტრუქტურულ სამუშაოებს ახორციელებენ. გაიწმინდა და კეთილმოეწყო კოტეჯები, ეკალ-ბარდებისგან გასუფთავდა ეზო, გაკეთდა ელექტროგაყვანილობა, მწვანეში ჩაფლული ფოლადაურის ხეობა ტურისტების დასახვედრად მზად არის.
წლების მანძილზე მიჩუმებული ხეობა მალე ახმაურდება, აქ სკაუტური ბანაკი გაიხსნება, სადაც 600-მდე 5-დან 25 წლის ჩათვლით სკაუტს ელოდებიან, მათ შორის იქნებიან ტურისტები მსოფლიოს სხვადასხვა ქვეყნებიდან. სკაუტური მოძრაობა მიზნად ისახავს ტურიზმის განვითარებას და ახალგაზრდებში არაფორმალური განათლების გაღვივებას. ისეთი უნარ-ჩვევების შეძენას, რომლის სწავლაც სკოლებში არ ხდება.
საქართველოში ყოველ ზაფხულს ეწყობა ნაციონალური ბანაკი, სადაც მთელი საქართველოს სკაუტები და არა მხოლოდ ისინი, შვიდი დღის მანძილზე დაუვიწყარ დროს ატარებენ. სკაუტური ბანაკი „თავგადასავალი 2016“ ბოლნისში წელს პირველად სოფელ ფოლადაურში 27 ივლისიდან 2 აგვისტოს ჩათვლით მოეწყობა.