საქართველოში აშშ-ის ელჩი იან კელი ამბობს რომ სტამბოლის ტერაქტთან დაკავშირებით აჰმედ ჩატაევის ბრალეულობა ოფიციალურად დადგენილი არაა. აშშ-ის ელჩი საქართველოს მიერ 2012 წელს ჩატაევის გათავისუფლების ფაქტის შეფასებას თავს არიდებს და ამბობს, რომ ტერორიზმის წინააღმდეგ მებრძოლმა ქვეყნებმა უსაფრთხოების სექტორში მაქსიმალურად მჭიდროდ უნდა ითანამშრომლონ.2012 წლის დეკემბერში, ხელისუფლების ცვლილების შემდეგ, აჰმედ ჩატაევი ჯერ გირაოთი გაათავისუფლეს, შემდეგ კი პროკურატურამ მასზე სისხლის სამართლის დევნა შეწყვიტა. ჩატაევი მალევე გაემგზავრა ავსტრიაში, სადაც ლტოლვილის სტატუსით ცხოვრობდა.

2015 წელს ამერიკის შეერთებულმა შტატებმა აჰმედ ჩატაევი გლობალურ ტერორისტთა სიაში შეიყვანა. უცხოური მედიის ინფორმაციით, ჩატაევი ავსტრიიდან სირიაში გაემგზავრა, სადაც ე.წ. ისლამური სახელმწიფოს ერთ-ერთ დაჯგუფებას ჩაუდგა სათავეში. თურქეთის ხელისუფლება ჯერჯერობით აღნიშნულ ინფორმაციას ჩატაევთან და ვადინოვთან დაკავშირებით ოფიციალურად არ ადასტურებს.

ცნობისათვის, სტამბოლის ათათურქის აეროპორტში 28 ივნისს მომხდარ ტერაქტს 44 ადამიანი ემსხვერპლა, 230-ზე მეტი დაშავებულია. მომხდარზე პასუხისმგებლობა ჯერჯერობით არც ერთ ტერორისტულ დაჯგუფებას არ აუღია. წინასწარი გამოძიებით, ტერაქტი ე.წ. ისლამურმა სახელმწიფომ მოაწყო.