რამდენიმედღიანი ძლიერი წვიმების შედეგად მდინარე მაშავერა ადიდდა, კალაპოტიდან გადმოვიდა და კონსტანტინე გამსახურდიას ქუჩაზე მცხოვრები ორი ოჯახის ეზო, საკარმიდამო ნაკვეთები,სარდაფები და საქონლის სადგომები დატბორა. ღამის საათებში მოვარდნილ ნიაღვართან გამკლავება მაღრაძეებისა და მერაბიშვილების ოჯახებმა საკუთარი ძალებით მოახერხეს. მერაბიშვილების სარდაფიდან წყლის ამოტუმბვას სახანძრო-სამაშველო სამსახური განახორციელებს.
ადიდებულმა მდინარემ მუხრანას და სავანეთის დამაკავშირებელ ერთადერთ საფეხმავლო ხიდს საყრდენი გამოაცალა და დააზიანა, რომელიც აღდგენას საჭიროებს. არსებული მდგომარეობა ადგილობრივი ხელისუფლების წარმომადგენლებმა დაათვალიერეს და მსგავსი შემთხვევების თავიდან აცილების მიზნით გასატარებელი ინფრასტრუქტურული სამუშაოები დაგეგმეს.
ნაპირსამაგრი სამუშაოები ჩატარდება მდინარე ფოლადაურზეც, რადგან ადიდებულმა მდინარემ მოსახლეობის ნაკვეთები დატბორა.