ნიდერლანდების სამეფო მიესალმება ევროკავშირთან ასოცირების შესახებ შეთანხმებისა და ზოგადად, დემოკრატიული რეფორმების განხორციელების კუთხით საქართველოს მიერ დაფიქსირებულ პროგრესს-საქართველოს ევროკავშირში ინტეგრაციის პროცესის მხარდაჭერა ნიდერლანდების სამეფოს საგარეო საქმეთა მინისტრის მოადგილემ, ევროპული თანამშრომლობის გენერალურმა დირექტორმა რობერტ დე ხროოტმა ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრთან დავით ბაქრაძესთან შეხვედრისას დაადასტურა. ნიდერლანდების საგარეო საქმეთა სამინისტროს წარმომადგენლებბა მადლიერება გამოხატეს საქართველოს მიერ საერთაშორისო სამშვიდობო, მათ შორის ევროკავშირის მშვიდობის მხარდამჭერ მისიებში შეტანილი წვლილისათვის.
30 მაისს ნიდერლანდების საგარეო საქმეთა სამინისტროში გაიმართა სახელმწიფო მინისტრის შეხვედრები ევროპული თანამშრომლობის გენერალური დირექტორის მოადგილე ანდრე ჰასპელსთან და აღმოსავლეთ პარტნიორობის საკითხებში სპეციალურ წარმომადგენელთან დირკ იან კოპთან.
1 ივნისს დავით ბაქრაძემ შეხვედრები გამართა ნიდერლანდების სამეფოს წარმომადგენლობითი პალატის წევრებთან- მიხილ სერვაესთან (ლეიბორისტული პარტიის სპიკერი საგარეო საკითხებზე) და ჰან ტენ ბრუკესთან (თავდაცვის კომიტეტის თავმჯდომარე, სახალხო პარტიის სპიკერი საგარეო საკითხებზე). შეხვედრებზე მხარეებმა საქართველოს ევროკავშირსა და ნატოში ინტეგრაციის საკითხებზე ისაუბრეს.
„ჩვენ არ გვაქვს შეცდომების დაშვების ფუფუნება. საქართველოს არის პასუხისმგებლობიანი პარტნიორი ნატო-სა და ევროკავშირისთვის და ეს ჩვენმა ქვეყანამ დაამტკიცა საერთაშორისო მშვიდობის მხარდამჭერ ოპერაციებში მონაწილეობითა და ევროპული უსაფთხოებისთვის მნიშვნელოვან საკითხებში წვლილის შეტანით,“ - განაცხადა ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრმა დავით ბაქრაძემ ჰააგის გლობალური სამართლის ინსტიტუტში (Hague Institute for Global Justice) სიტყვით გამოსვლისას.