დღეს 17 მაისია, ჰომოფობიასა და ტრანსფობიასთან ბრძოლის საერთაშორისო დღე, თუმცა, საქართველოში, სხვა დემოკრატიული ქვეყნებისგან განსხავებით, ლგბტ აქტივისტები ამ დღესთან დაკავშირებით მშვიდობიან აქციას უკვე მესამე წელია ვერ მართავენ. ამის მიზეზი სახელმწიფოს მხრიდან უსაფრთხოების არასაკმარისი გარანტიებია. ლგბტ აქტივისტები მიმდინარე თვის დასაწყისში შინაგან საქმეთა მინისტრის მოადგილე არჩილ თალაკვაძეს შეხვდნენ, რომელმაც აქციის ჩატარების რამდენიმე ალტერნატიული ადგილი შესთავაზა, თუმცა მათთვის პრინციპულად მნიშვნელოვანია, მშვიდობიანი აქცია ჩატარდეს რუსთაველის გამზირზე, სადაც 2013 წელს გამოხატვის თავისუფლება შეეზღუდათ და მათზე იძალადეს.

საქართველოს შინაგან საქმეთა სამინისტროში დღეს საპასუხო განცხადება არ გაკეთებულა, თუმცა მინისტრის მოადგილემ ლგბტ აქტივისტებს გუშინ უპასუხა და აღნიშნა, რომ ალტერნატიული ლოკაცია აქტივისტებისთვის არავის შეუთავაზებია, უსაფრთხოების გარანტიას კი კანონმდებლობა იძლევა.
მინისტრის მოადგილის ამ განცხადებიდან რამდენიმე საათში 10 ადამიანი ქუჩაში იმ სტენსილების გაკეთების გამო დააკავეს, რომლებზეც სიყვარულის თანასწორობაზე იყო საუბარი. ნახატები უკვე გადაღებილია, დაკავებული ადამიანების სასამართლო პროცესები კი გადაიდო.
ლგბტ აქტივისტებმა დღეს მხოლოდ რამდენიმე პერფორმანსის ჩატარება შეძლეს. პირველი სასტუმრო რედისონთან გაიმართა, სადაც ლევან ვასაძის მიერ ორგანიზებული ოჯახის შესახებ კონგრესი მიმდინარეობდა. სასტუმროს მიმდებარე ტერიტორიაზე ლგბტ დროშის ფერებში შეღებილი "ტაბურეტი" დაიდგა. აქტივისტების თქმით, ეს 2013 წლის 17 მაისის სიმბოლოა. მათ "ტაბურეტი" პოლიციამ მალევე ააღებინა, წინააღმდეგ შემთხვევაში დაჯარიმებით დაემუქრა.