იმდენად უსუსური ბრალდებით ჰყავთ დედაქალაქის ყოფილი მერი დაკავებული, რომ საზღვარგარეთ არსებობს განცდა იმის შესახებ, რომ წინა ხელისუფლების ლიდერები იდევნებიან პოლიტიკური ნიშნით. ამის ბრალია ზუსტად, რომ დღეს ქართული სახელმწიფოს მცდელობა წითელი ცირკულარის წესით მოხდეს ძებნილი პირების დაკავება გაუფასურდა და აღარ ენდობა ცივილიზებული სამყარო ჩვენს მოთხოვნებს.

აშკარაა რომ პროკურატურა დღეს ამ ქეისებთან მიმართებით არებითად მოუმზადებელია და აშკარად იკვეთება არაპროფესიონალიზმის ნიშნებიც. საქართველოს პროკურატურას მეტი არგუმენტაცია უნდა მიეცა ინტერპოლისთვის, მაგრამ ამისთვის საჭიროა მეტი კვალიფიკაცია და მეტი სიზუსტე, რაც ამჟამად არ გაგვაჩნია.

რეალურად მოხდა ასე, თავად ,,ქართული ოცნება’’ არ იყო მზად ხელისუფლებაში მოსასვლელად და მგონი ამაზე ბევრი რამ მეტყველებს, ისინი უამრავ დაპირებასთან ერთად ამბობდნენ გულზე მჯიღის ცემით, რომ დასჯიდნენ ნაციონალური მოძრაობის ლიდერებს. რეალურად ეს იყო რიტორიკა და მეტი არაფერი.
პროკურატურამ ახალაიას მიმართ ძებნის შეწყვეტასთან დაკავშირებით გააკეთა განცხადება, რომ 2015 წლის 18 თებერვალს ინტერპოლის აღმასრულებელი კომიტეტის გადაწყვეტილებით მოხდა წესების ცვლილება და თუ ძებნილი პირი ლტოლვილის სტატუსის მატარებელია განსხვავებული რეგულაციები დგინდება. პროკურატურა ახლა ცდილობს თავის მართლებას, რომ პოლიტიკური ნიშნით დევნის გამო არ შეწყვეტილა ცირკულარით ძებნა და იგი შეწყდა იმის გამო რომ დათა ახალია არის ლტოლვილის სტატუსის მქონე. ეს იცით რას ნიშნავს ? იმას, რომ პროკურატურა თავის მართლების რეჟიმშია, თორემ იქამდე ვიდრე დათა ახალია მოახდენდა ამ სტატუსის მოპოვებას, იქამდე უნდა მოხმდარიყო საჭირო ღონისძიებების გატარება.

ამაზე ვსაუბრობთ ზუსტად პარტია ,,რეფორმატორები’’, რომ სასიცოცხლო მნიშვნელობა აქვს რეფორმებს პროკურატურაში, პოლიციაში და სასამართლოში. ეს უწყებები უნდა გაძლიერდეს და არ იარსებოს ბრალდებამ რომ უსუსურები არიან. ეს ქვეყნის ღირსების საქმეა.