რუსეთის საოკუპაციო ძალების მიერ შექმნილი სეპარატისტული რეჟიმის მხრიდან წარმომადგენლობის გახსნა კიდევ ერთ ნათელ დასტურად მიმაჩნია იმისა, რომ ქართული სახელმწიფოს საგარეო ავტორიტეტი არსებითად შერყეულია და საგარეო უწყება - კონტრპროდუქტიული. ბოლო პერიოდში არაერთი ფაქტი დაფიქსირდა ევროპის ქალაქებში ოკუპირებული რეგიონების დელეგაციების ტურისტულ გამოფენებსა თუ სხვა მსგავს საერთაშორისო ღონისძიებებში მონაწილეობის, საქართველოს დიპლომატიური წარმომადგენლობების პასუხები კი ყოველთვის ერთია - «ღონისძიება კერძო კომპანიის მიერ იყო ორგანიზებული, ჩვენ შესაბამისი რეგიარება მოვახდინეთ და მათ ბოდიში მოიხადესო». აგერ, ორი დღის წინაც ოკუპირებული აფხაზეთის სავაჭრო-სამრეწველო პალატა პარიზში საერთაშორისო ტურისტულ გამოფენაზე «დამოუკიდებელ აფაზეთს» წარმოადგენდა, ქ-ნმა სირაძე-დელონემ კი სოციალურ ქსელში ამ საკითხზე გამართულ პოლემიკაში მოკრძალებულად — ერთი წინადადებით მიიღო მონაწილეობა: «ამ ღონისძიების მნიშვნელობას ასე მაღლა არ ავწევდიო»... არც ერთი ოფიციალური განცხადება ბოლო დროის მსგავს ფაქტებზე საქართველოს საგარეო პოლიტიკური უწყების რომელიმე წარმომადგენლისგან არ მომისმენია. და აი, ე.წ. სამხრეთ ოსეთი — საქართველოს ოკუპირებული რეგიონი იტალიის დედაქალაქ რომში წარმომადგენლობით ოფისს ხსნის! მოვუწოდებ საგარეო საქმეთა მინისტრს, დაუყონებლივ გააკეთოს სპეციალური განცხადება და იტალიის ხელისუფლებასთან დაიწყოს დიპლომატიური თანამშრომლობა ამ და სხვა მსგავსი ფაქტების აღსაკვეთად.