თბილისის საქალაქო სასამართლოს თავმჯდომარე 12 ხმით ერთის წინააღმდეგ გიორგი მიქაუტაძე გახდა. კანდიდატურას მხარი მხოლოდ პრეზინდეტის მიერ დანიშნულმა იუსტიციის უმაღლესმა საბჭოს წევრმა, ვახტანგ მჭედლიშვილმა არ დაუჭირა. მან დღევანდელ სხდომაზე სასამართლოს თავმჯდომარეობის კანდიდატად მოვალეობის შემსრულებელი, გიორგი ებანოიძე წარადგინა, რომელსაც საბჭომ კენჭი არ უყარა. ამის მიზეზი ის გახდა, რომ თავდაპირველად კენჭისყრაზე მიქაუტაძის საკითხი დადგა, შემდეგ კი საბჭოს წევრებმა ებანოიძისთვის კენჭისყრის საჭიროება ვერ დაინახეს. აღსანიშნავია ისიც, რომ ძირითადი კითხვა, რაც სხდომაზე ებანოიძის მიმართ ჰქონდათ, ეხებოდა საბჭოს გადაწყეტილებას მამუკა ახვლედიანის მიმართ. კერძოდ, ეთანხმებოდა თუ არა კანდიდატი ყოფილი თავმჯდომარის გათავისუფლების გადაწვეტილებას და ხედავდა თუ არა საქალაქო სასამართლში მენეჯმენტის კუთხით პრობლემებს.
იუსტიციის უმაღლესი საბჭოს სხდომას არასამთავრობო ორგანიზაციებიც ესწრებოდნენ, რომლებიც საქალაქო სასამართლოს თავმჯდომარის არჩევის პროცედურების შეჩერებას ითხოვდნენ. მათი განცხადებით, მამუკა ახვლედიანის გათავისუფლება მოხდა არაკანონიერად, რაც სასამართლოში გასაჩივრებულია. NGO-ების განმარტებით, თუ სასამართლო გადწყვეტილებას მამუკა ახვლედიანის სასარგებლოდ მიიღებს, სამართლებრივი შედეგი ვერ დადგება, რადგან სასამართლოს თავმჯდომარე უკვე გიორგი მიქაუტაძე იქნება. საბჭომ არასამთავრობოების მოთხოვნა არ დააკმაყოფილა და ამის არგუმენტად თბილისის საქალაქო სასამართლოს გადაწყვეტილება მოიყვანა, რომელმაც მამუკა ახვლედიანის შუამდგომლობა არ დააკმაყოფილა. ახვლედიანი ითხოვდა დროებით განჩინებას, რომლითაც იუსტიციის უმაღლესი საბჭო საქალაქო სასამართლოს თავმჯდომარის დანიშვნის პროცესს შეაჩერებდა. აღსანიშნავია, რომ საქალაქო სასამართლოს გადაწყვეტილება სწორედ იუსტიციის უმეღლესი საბჭოს სხდომის დაწყების წინ გამოქვეყნდა და ის არასამთავრობო ორგანიზაციების წარმომადგენლებს საბჭოს წევრმა, კახა სოფრომაძემ სხდომაზევე გააცნო.