- პარლამენტში დღეს მარჯვენასაჭიანი ავტომობილების აკრძალვის საკითხს და ახალ საგზაო რეგულაციებს განიხილავდნენ. პროექტი შინაგან საქმეთა მინისტრის მოადგილემ შალვა ხუციშვილმა წარადგინა. მისი თქმით, მთავრობა იძულებულია, ეს ნორმები უახლოეს მომავალში მიიღოს, რადგან რამდენიმე წლის შემდეგ შესაძლოა მარჯვენასაჭიანი ავტომობილების რაოდენობამ მარცხენასაჭიანების რაოდენობას გადააჭარბოს.

- თბილისში, პარლამენტის ყოფილ შენობასთან გამართულ აქციაზე ინციდენტი მოხდა. შეკრებილები მარჯვენასაჭიანი ავტომობილების რეგისტრაციის აკრძალვას აპროტესტებდნენ. შენობასთან მისულ თამაზ მეჭიაურს მონაწილეები სტვენითა და შეძახილებით შეხვდნენ. ერთ-ერთი მონაწილის, არტურ არუთინოვის მტკიცებით, ამის გამო მას დეპუტატმა ფიზიკური შეურაცხყოფა მიაყენა და სახეში გაარტყა. ინციდენტის ამსახველი ვიდეო ნაციონალურმა მოძრაობამ გაავრცელა.

- ქართული ოცნების ინფორმაციით, ნაციონალური მოძრაობა გარდაბნის არჩევნებში კანდიდატის მოხსნის საკითხს აქტიურად განიხილავს. პარტიის მოსაზრებით, ამის რეალური მიზეზი ისაა, რომ ოპოზიციური პარტია ამომრჩეველთა ხმების სოლიდური რაოდენობის მიღებას ვერ ახერხებს. ქართული ოცნების განცხადებით, გარდაბნის არჩევნების შედეგები ცხადყოფს იმ სოციოლოგიური კვლევების სიყალბეს, რომელთა თანახმად მმართველი რეიტინგი დრამატულად არის შემცირებული.
მმართველი გუნდის ინფორმაციას უარყოფს გარდაბანში ერთიანი ნაციონალური მოძრაობის გამგებლობის კანდიდატი. ბესიკ კახაბრიშვილი აღნიშნავს, რომ ის 28 იანვრის არჩევნებში მონაწილეობას მიიღებს. იაფფასიან ტყუილს უწოდებს ქართული ოცნების მიერ გავრცელებულ განცხადებას ფრაქციის თავმჯდომარე გიორგი გაბაშვილი.