- პარლამენტში 2016 წლის ბიუჯეტის პროექტს განიხილავენ. პროექტის მიხედვით მთავრობა ათი მთელი ერთი მეათედი მილიარდი ლარის დახარჯვას გეგმავს. ბიუჯეტის პროექტი საქართველოს ფინანსთა მინისტრმა ნოდარ ხადურმა წარადგინა.
ბიუჯეტის პროექტით 60 მილიონით იზრდება ცენტრალური მთავრობის შრომის ანაზღაურება. ნაციონალური მოძრაობის წევრთა თქმით, 2012 წლის შემდეგ ბიუროკრატიაზე 450 მილიონით მეტი იხარჯება.
- თბილისის ბიუჯეტი სავარაუდოდ, 815 მილიონ 900 ათასი ლარით განისაზღვრება. დედაქალაქის 2016 წლის ბიუჯეტის დაზუსტებული პროექტი მერიამ საკრებულოს უკვე გადაუგზავნა. როგორც დღეს გამართულ ბრიფინგზე დავით ნარმანიამ თქვა, საკრებულოს რეკომენდაციები, უმრავლესობასთან კონსულტაციების შედეგად, შეძლებისდაგვარად იქნა გათვალისწინებული. მისივე თქმით, ბიუჯეტის პროექტში კვლავ რჩება პრიორიტეტად ინფრასტრუქტურის განვითარება, განათლება, ჯანდაცვა, სოციალური ღონისძიებები და გამწვანების ღოისძიებები.
- საპარლამენტო უმცირესობამ რუსთავი 2-ის აქციაზე დაკავებული სამი პირის შესახებ შუამდგომლობა შეადგინა, რომელსაც პარლამენტის 50-მდე დეპუტატი აწერს ხელს. დეპუტატები პროკურატურას მიმართავენ და ითხოვენ აღკვეთის ღონისძიების, პატიმრობის შეცვლას. შუამდგომლობას საპარლამენტო ოპოზიცია და უმრავლესობის ნაწილი აწერს ხელს, მათ შორის, ეკა ბესელია, გედევან ფოფხაძე, ზვიად ძიძიგური, ვახტანგ ხმალაძე და ლუკა კურტანიძე. შუამდგომლობას ხელს აწერს დავით ლორთქიფანიძეც, ვისთვის მიყენებული შეურაცხყოფის გამოც დააკავეს აქციის მონაწილეები.