ბაია დავითაია მოსამართლე გიორგი ებანოიძეს კორუფციულ გარიგებაში დებს ბრალს. ამის შესახებ ადვოკატებმა დღეს გამართულ პრესკონფერენციაზე ისაუბრეს. საქმე ეხება ბაია დავითაისა და ბიზნესმენ თემურ უგულავას განქორწინებასა და ქონების გაყოფას. დავითაია და უგულავა 2002 წლიდან თანაცხოვრობდნენ, აქედან 8 წლის მანძლზე, დღემდე რეგისტრირებულ ქორწინებაში იმყოფებიან. სწორედ ქორწინებაში ყოფნის დროს დაგროვილი ქონების გაყოფას ითხოვს დავითაია, თუმცა მოსამართლეთა კოლეგიის წევრმა გიორგი ებანოიძემ, 2015 წლის 31 ივლისის გადაწყვეტილებით, მისი არცერთი სასარჩელო მოთხოვნა არ დააკმაყოფილა.
ადვოკატების თქმით, ქონების გაყოფაზე უარის საფუძვლად სასამართლო ასახელებს იმას, რომ ბაია დავითაია ქონების ღირებულების ზრდაში არ მონაწილეობდა, რადგან შვილის სამკურნალოდ საზღვარგარეთ იმყოფებოდა. აღსანიშნავია, რომ ბავშვი აუტისტური სპექტრის აშლილობის მქონეა, სასამართლომ კი თანხა, რასაც უგულავა შვილის რეაბილიტაციის ხარჯებისთვის იხდიდა, 25 %-ით შეამცირა. ადვოკატების თქმით, მოსამართლემ დავითაია არ ჩათვალა ქორწინების პერიოდში შეძენილი ქონების თანამესაკუთრედ ყოველგვარი სამართლებრივი საფუძვლების მითითების გარეშე, რაც იწვევს ეჭვს კორუფციული გარიგების შესახებ.