საქართველოს რეგიონული განვითარებისა და ინფრასტრუქტურის სამინისტროს მუნიციპალური განვითარების ფონდი მსოფლიო ბანკის დაფინანსებით ქალაქ თელავის შესასვლელში, სოფელ ვარდისუბანთან არსებული სამშენებლო ნარჩენების ტერიტორიას მოაწესრიგებს. მიმდინარე სამუშაოები საქართველოს რეგიონული განვითარებისა და ინფრასტრუქტურის მინისტრის პირველმა მოადგილემ, ილია დარჩიაშვილმა და მუნიციპალური განვითარების ფონდის აღმასრულებელმა დირექტორმა, ჯუანშერ ბურჭულაძემ დაათვალიერეს.
არსებული ნაგავსაყრელი ზიანს აყენებდა ადგილობრივ მოსახლეობას და საფრთხეს უქმნიდა ეკოლოგიას. პროექტის ფარგლებში, ვაზიანი-გომბორი-თელავის საავტომობილო გზის კმ 65-67კმ მონაკვეთის მიმდებარე ტერიტორია გასუფთავდა სამშენებლო ნარჩენებისგან. ასევე, ნატანისგან გაიწმინდა მდინარე მაწანწარასხევის კალაპოტი. ამასთან, მდინარე მაწანწარასხევთან ჩატარდა ნაპირსამაგრი სამუშაოები; კერძოდ, მოეწყო დამცავი გაბიონები და ქვაყრილი. გაბიონებსა და საავტომობილო გზას შორის დაგეგმილია ტერიტორიის კეთილმოწყობა და გამწვანება. აღნიშნული სამუშაოების დასრულების შემდეგ ეკოლოგიური პრობლემები სრულად მოგვარდება და მოსახლეობის ჯანმრთელობას საფრთხე აღარ დაემუქრება. სამშენებლო სამუშაოები, რომლის ღირებულება - 1 580 210,57 ლარია, მიმდინარე წლის შემოდგომაზე დასრულდება.