საქართველოს რეგიონული განვითარებისა და ინფრასტრუქტურის მინისტრის მოადგილემ თენგიზ შერგელაშვილმა სამინისტროს მიერ მომზადებული კანონპროექტების: „მაღალმთიანი რეგიონების განვითარების შესახებ“ და „ადგილობრივი თვითმმართველობის კოდექსში ცვლილებებისა და დამატებების შესახებ“ საქართველოს პარლამენტის მიერ მესამე მოსმენით მიღებაზე ისაუბრა. „მაღალმთიანი რეგიონების შესახებ“ კანონი ითვალისწინებს პრემიერ-მინისტრის ხელმძღვანელობით მთის ეროვნული საბჭოს შექმნას, რომლის საფუძველზე საქართველოს მთავრობა, გარკვეული კრიტერიუმების მიხედვით, მთაში მდებარე დასახლებებს მიანიჭებს მაღალმთიანი დასახლების სტატუსს. ეს იმას ნიშნავს, რომ ამ დასახლებაში მდებარე საწარმოები ისარგებლებენ საგადასახადო შეღავათებით, ხოლო იქ მუდმივად მცხოვრებ მოსახლეობას დაუწესდება სოციალური შეღავათები, მაგ. ფინანსური დახმარება ყველა ახალშობილზე ერთ წლამდე, ხოლო მესამე და შემდგომ შვილზე 2 წლამდე, სახელფასო დანამატები პედაგოგებისა და მედიცინის მუშაკებისათვის, სოციალური დახმარება პენსიონერებისათვის, შეღავათები ელ. ენერგიითა და ბუნებრივი გაზით სარგებლობისას და ა.შ.
ადგილობრივი თვითმმართველობის კოდექსში შეტანილი ცვლილებებით და დამატებებით შეიცვალა ამ ორგანული კანონის ის თავი, რომელიც ეხება თვითმმართველობაში მოქალაქეთა მონაწილეობას. მუნიციპალური ორგანოები ვალდებული გახდნენ, მათ მიერ მიღებული ნორმატიული აქტების გარდა, კანონით დადგენილ ვადებში პროაქტიულად გამოაქვეყნონ ისეთი დოკუმენტები, რომლებიც საზოგადოებისათვის არის საინტერესო. გამჭვირვალობის უფრო მაღალი სტანდარტების დასამკვიდრებლად, დაიხვეწა კოლეგიური ორგანოების სხდომებზე მოქალაქეთა უშუალო დასწრებისა და საკითხების განხილვაში მონაწილეობის გარანტიის მომცემი საკანონმდებლო დებულებები.