- დღეს მთავრობის სხდომაზე 2015 წლის ბიუჯეტის შეკვეცაზე იმსჯელეს. მთავრობის სხდომაზე ფინანსთა მინისტრმა განაცხადა, რომ ხარჯები 140 მილიონით მცირდება. თუმცა, განსხვავებული იყო ნოდარ ხადურის კომენტარი სხდომის დასრულების შემდეგ. მან თქვა, რომ ხარჯები 71 მილიონით შემცირდება, ხოლო ინფრასტრუქტურის დაფინანსება 85 მილიონით გაიზრდება. ხადურმა იქვე აღნიშნა, რომ დეტალური ინფორმაცია უახლოეს მომავალში გამოქვეყნდება.

- ბიუჯეტის ხარჯების შემცირების გეგმებს საპარლამენტო ოპოზიცია ეხმაურება. მიხეილ მაჭავარიანის თქმით, მთავრობამ უნდა წარმოადგინოს იმის გეგმაც, თუ რა წყაროებიდან დააფინანსებს სტიქიის ზარალს. ზურაბ მელიქიშვილის თქმით კი, ბიუჯეტის სეკვესტრი დაგვიანებულია.

- სტიქიის დროს ერთ-ერთი საკანალიზაციო მილის დაზიანების გამო, კანალიზაციის კოლექტორი ამ დრომდე მდინარე ვერეშია ჩაშვებული. მოხალისეებმა, რომლებიც მიმდებარე ტერიტორიაზე მუშაობდნენ ამის შესახებ მხოლოდ გუშინ, საზოგადოებრივი მაუწყებლის ეთერში გასული რეპორტაჟით გაიგეს. ისინი ხელისუფლებას არ გაუფრთხილებია.

- საქართველოს შინაგან საქმეთა მინისტრი ადასტურებს, რომ ფრანგული წარმოების თვითმფრინავები შინაგან საქმეთა სამინისტროს გადაეცემა და ამ საკითხთან დაკავშირებით მუშაობა მიმდინარეობს. შინაგან საქმეთა მინისტრისგან განსხვავებულ ინფორმაციას ავრცელებს თავდაცვის მინისტრის მოადგილე და ამბობს, რომ ვერტმფრენების რომელი უწყებისათვის გადაცემის საკითხი ჯერ გადაწყვეტილი არ არის.