ევროკავშირის შეთავაზებები რიგის სამიტზე საქართველოსა და აღმოსავლეთ პარტნიორობის სხვა წევრებისთვის საკმაოდ მწირი იქნება, რისი მიზეზიც კრემლის გაღიზიანების შიშია. ამის შესახებ როიტერი სამიტის დეკლარაციაზე დაყრდნობთ იუწყება.
დოკუმენტში ამ ქვეყნებს ევროკავშირში ინტეგრაციის პერსპექტივას არ სთავაზობენ. ასევე, როიტერის ცნობით, რიგის სამიტზე საქართველოს და უკრაინას არ შესთავაზებენ უვიზო მიმოსვლას, რადგან ამ ქვეყნებმა ჯერ საჭირო რეფორმები უნდა გაატარონ. ამავე დროს, როიტერის ინფორმაციით, ევროკავშირი უარს ეუბნება მოსკოვს უკრაინასთან თავისუფალი ვაჭრობის შესახებ ხელშეკრულების ამოქმედების კიდევ ერთი წლით გადავადებაზე.
როიტერის ინფორმაციას გამოხმაურებები მოჰყვა თბილისშიც. საქართველოს პარლამენტის თავმჯდომარე აცხადებს, რომ რიგის სამიტით არც იწყება და არც მთავრდება ყველაფერი. დავით უსუფაშვილის თქმით, შედეგი ერთ თვეში ვერ იქნება და მთავარია რომ სწორი ნაბიჯებით მივდივართ წინ. განათლების მინისტრი კი მიიჩნევს, რომ ის მოლოდინები, რაც საქართველოში არსებობს რიგის სამიტთან დაკავშირებით, გამართლებულია, რადგან ბევრი სამუშაო გატარდა.