- თბილისის ყოფილი მერი პატიმრობაში რჩება - მოსამართლემ დაცვის მხარის შუამდგომლობის დაკმაყოფილებაზე უარი თქვა. მუგულავას წინასწარი პატიმრობის ცხრათვიანი ვადა 2 აპრილს გაუვიდა და რადგან საქმეზე განაჩენი ჯერ არ დამდგარა, ის უნდა გათავისუფლებულიყო. თუმცა, 14 მარტს, პროკურატურამ უგულავას ბრალი დაუმძიმა. სასამართლოს გადაწყვეტილების არაკონსტიტუციურობაზე მიუთითებს დაცვის მხარე, მათ უკვე შეიტანეს სარჩელი საკონსტიტუციო სასამართლოში.
- მთავრობის ადმინისტრაციაში იმედს გამოთქვამენ, რომ პრეზიდენტი მთავრობის განახლებულ შემადგენლობას პარლამენტს დროულად წარუდგენს - ნდობის გამოცხადების პროცედურის დასაწყებად მზად არიან საქართველოს პარლამენტშიც. პარლამენტის იურიდიული კომიტეტის თავმჯდომარე კი პრეზიდენტის საკონსტიტუციო უფლებას, მთავრობის შემადგენლობა პარლამენტს ერთი კვირის ვადაში წარუდგინოს, არალოგიკურს უწოდებს.
- საერთაშორისო გამჭვირვალობა - საქართველო საქართველოს სხვადასხვა მხარის გუბერნატორების წარსულისა და ქონებრივი დეკლარაციების შესახებ კვლევას აქვეყნებს - არასამთავრობო ორგანიზაციის ინფორმაციით, ორმა გუბერნატორმა ქონებრივი დეკლარაციის შევსებისას ბიზნესწილები დამალა. აღსანიშნავია მცხეთა-მთიანების გუბერნატორის წარსულის ერთი დეტალი - მან განათლება ბიძინა ივანიშვილთან აფილირებულ, ფსიქოანალიზისის შემსწავლელ ცენტრ მენცარში მიიღო.
- საქართველოს ეროვნულმა ბანკმა ბოლო დროის მანძილზე ბანკის მუშაობასთან დასმულ კითხვებზე კომენტარი გააკეთა. ბანკის საზოგადოებასთან ურთიერთობის დეპარტამენტის ხელმძღვანელმა კახა ბარაბაძემ თქვა, რომ ბანკი მზად არის დეპუტატების მიერ დასმულ კითხვებს პასუხი გასცეს. ეროვნულმა ბანკმა 2014 წლის მუშაობის ანგარიში უკვე გადაუგზავნა საქართველოს პარლამენტს, ეროვნული ბანკი დეპუტატებს ანგარიშის დროული შესწავლისკენ მოუწოდებს.