ორმა გუბერნატორმა ქონებრივი დეკლარაციის შევსებისას ბიზნესწილები დამალა - ამაზე საუბარია საერთაშორისო გამჭვირვალობა - საქართველოს კვლევაში, რომელიც დღეს გამოქვეყნდა. კვლევის მიხედვით, ქვემო ქართლის და იმერეთის გუბერნატორებმა ქონებრივი დეკლარაცია არასრულყოფილად შეავსეს, რადგან საკუთარი ან ოჯახის წევრის ბიზნესწილები დამალეს, ეს კი „საჯარო სამსახურის შესახებ“ კანონის დარღვევაა. გარდა ამისა, ორგანიზაციის ინფორმაციით, იმერეთის გუბერნატორი ამ დრომდე ინარჩუნებს დირექტორის თანამდებობას მისსავე წილობრივ მფლობელობაში არსებულ საწარმოში, რაც „საჯარო სამსახურში ინტერესთა შეუთავსებლობისა და კორუფციის შესახებ“ კანონის დარღვევაა.
საერთაშორისო გამჭვირვალობაში ამბობენ, რომ ქართული კანონმდებლობა მსგავს შემთხვევებზე რეაგირების ეფექტიან მექანიზმებს არ ითვალისწინებს და ხელისუფლებას დამოუკიდებელი და ეფექტური ანტიკორუფციული მექანიზმის შექმნისკენ მოუწოდებენ. გარდა ამისა, ორგანიზაციაში კიდევ ერთხელ აღნიშნავენ, რომ გუბერნატორების შემთხვევაშიც იკვეთება კავშირები ბიძინა ივანიშვილთან ასოცირებულ კომპანიებსა და ფონდებთან.