ბატონი დავითიცა და პროცედურული დემოკრატიის სხვა მამები მომიტევებენ ტერმინოლოგიურ უზუსტობას, როგორც არ უნდა ვთქვათ, უკაცრავად და, მთავრობა გადადგა , - ამის შესახებ პარლამენტის პლენარულ სხდომაზე სიტყვით გამოსვლისას "ნაციონალური მოძრაობის" წევრმა სერგო რატიანმა განაცხადა.
"მთავრობას დასჭირდება ახალი მანდატი, შესაბამისად ის ფაქტობრივად არის გადამგარი. 21 მარტის აქციაზე გახსოვთ, მოთხოვნა იყო მთავრობის გადადგომა. ერთი თვე არ არის გასული და ფაქტი სახეზეა – მთავრობა გადამდგარია. მნიშვნელოვანია, რომ საზოგადოების აქტიურობამ შედეგი გამოიღო. მთავრობა, რომლის ერთადერთი არგუმენტი არის კვერცხების სროლა და ძალადობა, ბუნებრივია, დიდხანს ვერ გაძლებდა, მაგრამ უნდა მოვუწოდო ჩემს კოლეგებს – ნუ მიიღებთ ამას როგორც დამარცხებას, მიიღეთ როგორც ფაქტი, რეალობა და შესაძლებლობა იმისა, რომ პარლამენტმა აიღოს ხელში ინიციატივა და ორი ამოცანის გადაჭრა შევძლოთ. ერთი, ეს არის ქვეყნის ფაქტობრივი მმართველის, ბიძინა ივანიშვილის ჩამოშორება მმართველობიდან. ეს იქნება ჩვენს ეპოქაში ერთ-ერთი მძიმე ფურცლის გადაშლა, როდესაც ჩვენ ფაქტობრივად ოლიგარქიულ მმართველობაში შევედით და ეს უნდა რაღაცნაირად დავასრულოთ. მეორე ამოცანაა შევქმნათ ტექნიკური მთავრობა იმისათვის, რომ დაიწყოს ქვეყნის კრიზისიდან გამოსვლა. ბატონი ლუკა ამბობდა, რომ გაახილეთ თვალებიო. ჩვენ გავახილეთ თვალები და მართალი გითხრათ, თვალებს არ დავუჯერეთ, როდესაც დღეს ვხედავთ ლარის კურსს; თვალებს არ დავუჯერეთ, როდესაც ვნახეთ საყდრისი, რომელიც უნდა ყოფილიყო ჩვენი სიამაყე და ის არის დანგრეული. ამიტომ ეს არ უნდა განმეორდეს. ჩვენ გვეძლევა შესაძლებლობა, შევქმნათ ახალი, ტექნიკური მთავრობა", - განაცხადა სერგო რატიანმა.