,,გთხოვთ, შემიშვათ სკოლაში,“ ,, ნუ დამტოვებთ ბაღში 8 დღის გამო“ - ამ სლოგანებით დღეს მშობელთა საინიციატივო ჯგუფმა შვილებთან ერთად განათლებისა და მეცნიერების სამინისტროსთან გამაფრთხილებელი აქცია გამართეს. მშობლები იმ ბავშვების მიღებას ითხოვენ სკოლაში, რომლებსაც 6 წელი 31 დეკემბრის ჩათვლით უსრულდებათ. აქციაზე იმყოფებოდა თავად კანონპროექტის ავტორი, კობა სუბელიანი. მისი თქმით, განათლების სამინისტროს არ აქვს პასუხი, თუ რა სხვაობას იძლევა 10-20 დღე. აქციის მონაწილეებს შორის უმრავლესობა იმ ბავშვების მშობლები იყვნენ, რომელთა შვილებსაც სწავლის დაწყებიდან რამდენიმე დღეში, ან მაქსიმუმ ერთ თვეში უსრულდებათ 6 წელი. როგორც ისინი ამბობენ, იძულებულები არიან ბავშვები ვერც სკოლაში ატარონ და ვერც ბაღში. მოგვიანებით აქციის მონაწილეებს განათლებისა და მეცნიერების მინისტრის მოადგილე, გიორგი შარვაშიძე შეხვდა, თუმცა მათ კონკრეტულ შეთანხმებას ვერ მიაღწიეს.