შინაგან საქმეთა მინისტრის მოადგილემ, ლევან იზორიამ გადაცემა „რეაქციის“ ეთერში თოქ-შოუს წამყვანს ინგა გრიგოლიას შენიშვნა მისცა.
იზორიას თქმით, როდესაც გადაცემის დასაწყისში გრიგოლიამ განაცხადა, რომ უმრავლესობის წევრების მხრიდან ადგილი ჰქონდა ერთგვარ მითითებას, არ გაეშუქებინა „ნაციონალური მოძრაობის“ მიერ დაგეგმილი აქციის თემა თოქ-შოუს ფორმატში, მსგავს შემთხვევას ადგილი არ ჰქონია.

„პატარა კორექტირებას გავაკეთებ, თქვენ თქვით, რომ ერთგვარ მითითებას ჰქონდა ადგილი, მერწმუნეთ, მე დავაზუსტე და ასეთ რამეს ადგილი არ ჰქონია“,- მიმართა ლევან იზორიამ გადაცემის წამყვანს.

ინგა გრიგოლია დაინტერესდა, რა ფორმით გაარკვია შინაგან საქმეთა მინისტრის მოადგილემ პროდიუსერებსა და საპარლამენტო უმრავლესობას შორის რა მოლაპარაკებები იყო.
„რას ნიშნავს ჩემს გადაცემაზე კომენტარი შინაგან საქმეთა მინისტრის მოადგილისგან?! რას ნიშნავს, გაარკვიეთ და როგორ გაარკვიეთ?! მაინტერესებს, რა ფორმით გაარკვიეთ რა მოლაპარაკებები იყო ჩვენს პროდიუსერებსა და საპარლამენტო უმრავლესობას შორის“,- მიმართა გრიგოლიამ ლევან იზორიას.

გადაცემის დასაწყისში გადაცემა „რეაქციის“ წამყვანმა ინგა გრიგოლიამ განაცხადა, რომ ხელისუფლებამ მოსთხოვა, „ნაციონალური მოძრაობის“ მიერ დაგეგმილი აქციის თემა თოქ-შოუს ფორმატში არ გაეშუქებინა.

„უმრავლესობამ კატეგორიულად მოითხოვა, რომ ეს თემა თოქ-შოუს ფორმატში არ გაშუქებულიყო, წინააღმდეგ შემთხვევაში, მათ განგვიცხადეს, რომ გადაცემაში არ მოვიდოდნენ. ჩვენ, რასაკვირველია, ხელისუფლების მოთხოვნას არ ვემორჩილებით, რა თემა უნდა გავაშუქოთ და რა- არა. ვნახოთ, გადაიფიქრებს თუ არა ხელისუფლება იგივე ქმედებას, რაც 2006 წელს ამ სტუდიაში, სწორედ „რეაქციის“ ბოიკოტირებით დაიწყო“, - განაცხადა ინგა გრიგოლიამ.