საქართველოს რეგიონული განვითარებისა და ინფრასტრუქტურის მინისტრმა, დავით შავლიაშვილმა, აშშ-ს ელჩმა საქართველოში - რიჩარდ ნორლანდმა, ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა მინისტრმა, სოზარ სუბარმა და სოფლის მეურნეობის მინისტრმა, ოთარ დანელიამ გორის მუნიციპალიტეტის სოფელ შავშვებში, დევნილთა საყოფაცხოვრებო პირობების გაუმჯობესების მიზნით განხორცილებული სამუშაოები დაათვალიერეს. ღონისძიებას ადგილობრივი ხელისუფლების წარმომადგენლები და USAID-ის მისიის დირექტორი სტეფან ჰაიკინი ესწრებოდნენ.
ამერიკის შეერთებული შტატების საერთაშორისო განვითარების სააგენტოს მხარდაჭერით საქართველოს მუნიციპალური განვითარების ფონდი საქართველოს სხვადასხვა მუნიციპალიტეტში იძულებით გადაადგილებული პირებისათვის ღირსეული საცხოვრებელი პირობების შექმნის მიზნით სხვადასხვა ინფრასტრუქტურულ პროექტს ახორციელებს. აღნიშნული პროექტების ფარგლებში, დევნილთა 5 კოტეჯურ დასახლებაში (სკრა, ახალსოფელი, თელიანი, წილკანი და ფრეზეთი) გაიწმინდა სანიაღვრე სისტემები და მოეწყო სადრენაჟე არხები. 9 კოტეჯურ დასახლებაში (ბერბუკი, ხურვალეთი, სკრა, შავშვები, კარალეთი, ახალსოფელი, მოხისი, მეტეხი და წილკანი) განხორციელდა წყალმომარაგების სისტემების რეაბილიტაცია, მოეწყო დამატებითი სატუმბი სადგურები და მოხდა არსებული სატუმბის რეაბილიტაცია. ასევე, განხორციელდა 5 კოტეჯური დასახლების (თელიანი, ახალსოფელი, მოხისი, ხურვალეთი და სკრა) გაზიფიცირება. გარდა ამისა, USAID-ის ფინანსური მხარდაჭერით საქართველოს მუნიციპალური განვითარების ფონდმა საქართველოს გაერთიანებული სამელიორაციო სისტემების კომპანიისთვის 551.000 ლარის ღირებულების ტექნიკა: ექსკავატორი, ორი ტრაქტორი, პიკაპის ტიპის ორი ავტომობილი და ამდენივე ყველგანმავალი შეიძინა.
გახორციელებული სამუშაოების შედეგად, საყოფაცხოვრებო პირობები დევნილთა კოტეჯური ტიპის კომპაქტურ დასახლებებში მცხოვრებ 3 446 ოჯახს (10 338 პირს) გაუუმჯობესდა. სამუშაოების საერთო ღირებულებამ 22.976.000 ლარი შეადგინა.