რადიო "სპუტნიკი" ინტერნეტის საშუალებით, საინფორმაციო სააგენტოს სახით მუშაობას აგრძელებს. საქართველოს კანონმდებლობის თანახმად საინფორმაციო სააგენტო საქმიანობის ავტორიზაციას ან ლიცენზირებას არ ექვემდებარება და კომისიის რეგულირების სფეროში არ შემოდის.
რაც შეეხება, რადიო "სპუტნიკის" მაუწყებლობას 2014 წლის 25 დეკემბერს კომისიამ შპს „რ-რადიოს“ და შპს „საერთაშორისო საინფორმაციო სააგენტო Newsgeorgia“-ს უკანონო მაუწყებლობისთვის ერთობლივად 5 ათასი ლარის ოდენობით ჯარიმა დააკისრა. ხანგრძლივი განხილვის შემდეგ კომისიამ მიიჩნია, რომ შპს „საერთაშორისო საინფორმაციო სააგენტო Newsgeorgia“ საკუთარი სარედაქციო პასუხისმგებლობით ამზადებდა რადიოპროდუქციას, რომელსაც 101,4 მეგაჰერც სიხშირეზე სახელწოდებით - „რადიო სპუტნიკი საქართველო“, შპს „რ-რადიო“ ავრცელებდა რაც ერთობლივად მაუწყებლობის განხორციელებაა შესაბამისი ლიცენზიისა და ავტორიზაციის გარეშე.