საქართველოს რეგიონული განვითარებისა და ინფრასტრუქტურის სამინისტროს საავტომობილო გზების დეპარტამენტმა ბოდბისხევში ნაპირსამაგრი სამუშაოები დაასრულა. განხორციელებული პროექტი დღეს საქართველოს რეგიონული განვითარებისა და ინფრასტრუქტურის მინისტრის მოადგილემ გიორგი კობერიძემ და საავტომობილო გზების დეპარტამენტის თავმჯდომარემ ვაჟა ფანჩულიძემ დაათვალიერეს.
ნაპირგამაგრება 1,2 კმ-იან მონაკვეთზე განხორციელდა. ორივე სანაპირო ზოლზე მოხდა ძველი მონაკვეთების დემონტაჟი. ხევის ნაპირები და ფსკერი კი რკინა-ბეტონის ახალი კონსტრუქციით მოპირკეთდა. აღსანიშნავია, რომ ამ სოფელში ნაპირსამაგრი სამუშაოები 70-იანი წლების შემდეგ არ ჩატარებულა. დაზიანებული იყო ბოდბისხევის ორივე ნაპირი, რის გამოც უხვი ნალექის დროს მოვარდნილი წყალი ადგილობრივთა საცხოვრებელ სახლებს დატბორვის საფრთხეს უქმნიდა.
ნაპირგამაგრების სამუშაოები სახელმწიფო ბიუჯეტიდან დაფინანსდა და მისმა ღირებულებამ 1.050.000 ლარი შეადგინა. ამ პროექტზე დასაქმებული იყო 100 ადამიანი. გარდა უკვე განხორციელებული სამუშაოებისა, უახლოეს პერიოდში ბოდბისხევში ახალი პროექტების დაწყებაც იგეგმება, რომლის ფარგლებშიც სანაპირო ზოლის დარჩენილი ნაწილი და საგზაო ინფრასტრუქტურა რეაბილიტირდება. შედეგად, ადგილობრივი მოსახლეობა დაცული იქნება ხევში მოვარდნილი წყლით დატბორვისაგან. ასევე, მოიხსნება გადაადგილების პრობლემაც.