10 დეკემბერი “მეგზევის დღეა”. თბილისის ისტორიის მუზეუმში „ქარვასლა“ ქართველ მეგზევეებს პროფესიული დღე საქართველოს რეგიონული განვითარებისა და ინფრასტრუქტურის მინისტრის პირველმა მოადგილემ, გიორგი ამაშუკელმა და საავტომობილო გზების დეპარტამენტის თავმჯდომარემ, ვაჟა ფანჩულიძემ მიულოცეს.
გიორგი ამაშუკელმა, 2014 წელს საგზაო სექტორში წარმატებული საქმიანობისთვის 38 მეგზევე, სამშენებლო კომპანიების წარმომადგენლები და ამავე სფეროში მოღვაწე ვეტერანები დააჯილდოვა. პროფესიული დღის აღნიშვნასთან ერთად, საქართველოს საავტომობილო გზების დეპარტამენტის თავმჯდომარემ, ვაჟა ფანჩულიძემ დამსწრე საზოგადოებას უწყების 2013-2014 წლების საქმიანობის შედეგები გააცნო და საგზაო ინფრასტრუქტურის მოწესრიგების პროცესებში ჩართულ პირებს გაწეული შრომისთვის მადლობა გადაუხადა. ღონისძიებაზე საავტომობილო გზების, ახალი აშენებული ხიდებისა და გვირაბების ამსახველი ფოტოგამოფენაც მოეწყო.
აღსანიშნავია, რომ ბოლო 2 წლის განმავლობაში, საქართველოს რეგიონული განვითარებისა და ინფრასტრუქტურის სამინისტრომ გზებისა და ხიდების მშენებლობაზე პირდაპირ და ირიბად საქართველოს 15 ათასი მოქალაქე დაასაქმა. ამ პერიოდში რეაბილიტაცია ჩაუტარდა 554 კმ გზასა და 87 ხიდს. აშენდა 50 კმ ჩქაროსნული ავტომაგისტრალი და 16 ახალი ხიდი.