საქართველოს მთავრობა 2 წლის საქმიანობის ანგარიშს ყველა რეგიონის მოსახლეობას წარუდგენს. მთავრობის ანგარიშის პირველი პრეზენტაცია იმერეთში გაიმართა, სადაც სამინისტროების პირველმა პირებმა საზოგადოებას ამომწურავი ინფორმაცია მიაწოდეს რეგიონში 2 წლის განმავლობაში განხორციელებულ პროექტებზე, პროგრამებსა და ასევე, სამომავლო გეგმებზე. მთავრობის წევრებთან ერთად, ადგილობრივებს საქმიანობის ერთწლიანი ანგარიში წარუდგინა იმერეთში სახელმწიფო რწმუნებულმა-გუბერნატორმა ზაზა მეფარიშვილმა. აღნიშნული ღონისძიებები პროექტ „საქართველოს მთავრობა - ღია მმართველობისთვის“ ფარგლებში გაიმართა.
როგორც პრეზენტაციაზე საქართველოს რეგიონული განვითარებისა და ინფრასტრუქტურის მინისტრის პირველმა მოადგილემ გიორგი ამაშუკელმა განაცხადა, 2013 – 2014 წლებში იმერეთის რეგიონში 358,418,4 მლნ ლარის ღირებულების ინფრასტრუქტურული პროექტი განხორციელდა, ხოლო 465,5 მლნ ლარის ოდენობის პროექტები მიმდინარეობის პროცესშია. საავტომობილო გზების მშენებლობის 34 პროექტის დაფინანსებაზე კი 332,6 მილიონი ლარი დაიხარჯა.