საქართველოს რეგიონული განვითარებისა და ინფრასტრუქტურის მინისტრის მოადგილემ, თენგიზ შერგელაშვილმა ტაჯიკეთის რესპუბლიკის სამთავრობო დელეგაციასთან შეხვედრა გამართა. მის მიზანს მხარეებს შორის სხვადასხვა მიმართულებით ინფორმაციის გაცვლა და ურთიერთგამოცდილების გაზიარება წარმოადგენდა.
ორი ქვეყნის წარმომადგენლებს შორის შეხვედრა ინფრასტრუქტურის სამინისტროში შედგა. დელეგაციის შემადგენლობაში იმყოფებოდნენ ტაჯიკეთის რესპუბლიკის პრეზიდენტის აპარატის, პარლამენტის, ფინანსთა სამინისტროსა და სხვა უწყების წარმომადგენლები, რომლებსაც ხელმძღვანელობას ეკონომიკური განვითარებისა და ვაჭრობის მინისტრის მოადგილე, უმედ დავლატზოდი უწევდა. ტაჯიკური მხარე საქართველოში მიმდინარე და დაგეგმილი ინფრასტრუქტურული პროექტებით დაინტერესდა. ასევე, საუბარი შეეხო ქვეყანაში მიმდინარე თვითმმართველობის რეფორმის განხორციელების ეტაპებსაც. თენგიზ შერგელაშვილმა სტუმრებს მათთვის საინტერესო საკითხებზე დეტალური ინფორმაცია მიაწოდა.
შეხვედრის დასასრულს, ორი ქვეყნის წარმომადგენლები სხვადასხვა მიმართულებით თანამშრომლობის გაღრმავებაზე შეთანხმდნენ და იმედი გამოთქვეს, რომ ეს პროცესი ორივე ქვეყნისთვის სასარგებლო და ნაყოფიერი იქნება.