„საქართველოს სამწუხარო მაგალითი ნამდვილად არ გამოდგა ევროპისთვის და საერთაშორისო დემოკრატიული თანამეგობრობისთვის შემოფხიზლების ზარის შემოკვრად. ნებისმიერ შემთხვევაში, ვინც რა შეცდომა დაუშვა, აგრესორი, ამ შემთხვევაში, ცალსახად არის რუსეთი. საქართველოს ტერიტორიების 20% არის ოკუპირებული რუსეთის მიერ და დღეს არის მცდელობა მისი ტერიტორიის გარკვეული ნაწილის ანექსიის დაწყების. ყველას თავისი წილი პასუხისმგებლობა ეკისრება, ცალსახად, იმჟამინდელ ხელისუფლებასაც, რა თქმა უნდა, მაგრამ რეალურად ეს უნდა ყოფილიყო ძალიან მნიშვნელოვანი განგაშის საგანი, რაც არ გახდა, სამწუხაროდ, რასაც მერე მოჰყვა უკრაინა. უკრაინის ხელისუფლება განსხვავებულად მოქმედებდა, მაგრამ მოხდა ანექსია უკრაინის ტერიტორიების, ღია, პირდაპირი აგრესია ახლაც კი მიმდინარეობს უკრაინის სახელმწიფოს მიმართ რუსეთის ხელისუფლების მხრიდან“-აღნიშნა ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრმა ალექსი პეტრიაშვილმა პოლონეთის რესპუბლიკის სეიმის მარშალის რადოსლავ შიკორსკის განცხადების კომენტირებისას. პოლონეთის საგარეო საქმეთა ყოფილმა მინისტრმა პოლონურ გამოცემა “Gazeta Wyborcza”-სთან ინტერვიუში 2008 წლის რუსეთ-საქართელოს ომი გაიხსენა და განაცხადა, რომ „ საქართველო არ იყო რუსეთის განზრახვების დამაჯერებელი მტკიცებულება, რადგან იქ პრეზიდენტმა სააკაშვილმა საკუთარი თავის პროვოცირების უფლება მისცა და პირველმა გახსნა ცეცხლი“.