სახელმწიფო მაღალი რისკის ჯგუფის წარმომადგენლების უფასო ვაქცინაციას ორშაბათიდან იწყებს. ჯანდაცვის მსოფლიო ორგანიზაცია მაღალი რისკის ჯგუფებს აკუთვნებს ნებისმიერი ქრონიკული დაავადებების მქონე პირებს, ორსულებს, სპეციალურ თავშესაფრებში მცხოვრებ პირებსა და სამედიცინო პერსონალს. უფასო ვაქცინით უზრუნველყოფა ასევე შესაძლებელი იქნება 18 წლამდე ასაკის დიაბეტით დაავადებული პირებისთვისაც. როგორც დაავადებათა კონტროლის ეროვნული ცენტრის გადამდებ დაავადებათა დეპარტამენტის ხელმძღვანელი ხათუნა ზახაშვილი აღნიშნავს, რეკომენდებულია მოსახლეობის დანარჩენმა ნაწილმაც გაიკეთოს გრიპის საწინააღმდეგო ვაქცინა, რომელიც თავად უნდა შეიძინონ. მისი განმარტებით, ვაქცინის გაკეთებიდან ერთი წლის განმავლობაში ადამიანი გრიპის ვირუსისგან დაცულია.