საქართველოს განათლებისა და მეცნიერების სამინისტროს დაფინანსებითა და თბილისის სახელმწიფო სამედიცინო უნივერსიტეტის ორგანიზებით, თბილისისა და რეგიონული უნივერსიტეტების სამედიცინო პროფილის სტუდენტებისთვის ზაფხულის სკოლის პროგრამა განხორციელდა სახელწოდებით - თანამედროვე ტენდეციები სამედიცინო ვიზუალიზაციაში და პაციენტისა და პერსონალის უსაფრთხოება. კონფერენციის მონაწილეებს საქართველოს განათლებისა და მეცნიერების მინისტრის მოადგილე გიორგი შარვაშიძე შეხვდა.
ზაფხულის სკოლა ბირთვული და რადიაციული მედიცინის, დიაგნოსტირებისა და უსაფრთხოების სისტემების განვითარებას მიეძღვნა და მისის მიზანი იყო პროექტში მონაწილე სტუდენტების განათლების დონის ამაღლება, უნივერსიტეტების აკადემიური პერსონალისა და დარგის წამყვანი უცხოელი ექსპერტ-პროფესორებს შორის კონტაქტების დამყარება, სტუდენტებისათვის ცოდნისა და გამოცდილების გაზიარება.
ზაფხულის სკოლაში ისეთი ცნობილი უცხოელი მეცნიერები მონაწილეობდნენ როგორიცაა პროფესორები: მადან რეჰანი - მშვიდობის დარგში 2005 წლის ნობელის პრემიის ლაურეატი, სამედიცინო ფიზიკოსთა საერთაშორისო ორგანიზაციის (IOMP) გენერალური დირექტორი. ჯონ დამილაკისი - ევროგაერთიანების სამედიცინო ფიზიკოსთა ორგანიზაციის (EFOMP) პრეზიდენტი. დარელ ფიშერი - შეერთებული შტატების ჯანრმთელობის ფიზიკოსთა ასოციაციის პრეზიდენტი.ნიკოლას პალიკარაკისი - ტემპუსის პროგრამა „Bio Medical Engineering Education Tempus Initiative in Eastern Neighbouring Area“ კოორდინატორი.
სამინისტრო უმაღლესი განათლების ხარისხის ამაღლების მიზნით, აფინანსებს და ხელს უწყობს ზაფხულისა და ზამთრის სკოლების განხორციელებას. პროექტის მთავარი მიზანია სტუდენტების კვალიფიკაციის ამაღლება, მათი აქტიური ჩართვა და მონაწილეობა სამეცნიერო განხილვებში, მითუმეტეს მაშინ, როდესაც პროექტი უზრუნველყოფს სტუდენტთა რეგიონულ თანამშრომლობას.