ბავშვთა დაცვის საერთაშორისო დღეს საქართველოს რეგიონული განვითარებისა და ინფრასტრუქტურის მინისტრის მოადგილე, თეიმურაზ მურღულია ოზურგეთის საბავშვო ბაღს ესტუმრა.
სიორიძის ქუჩაზე მდებარე საბავშვო ბაღი, რომელშიც 135 პატარა დადის, 2013 წელს რეგიონებში განსახორციელებელი პროექტების ფონდიდან დაფინანსდა. პროექტისთვის გამოყოფილი 300 000 ლარის ფარგლებში, ჩატარდა შენობის რეაბილიტაცია და ბაღი საჭირო ინვენტარით აღიჭურვა.

მინისტრის მოადგილე ბაღის აღსაზრდელებს შეხვდა და, ბავშვთა დაცვის საერთაშორისო დღის აღსანიშნავად, წიგნები და ტკბილეული გადასცა.

რეგიონებში განსახორციელებელი პროექტების ფონდიდან, 2013 წელს, საქართველოს მასშტაბით - 23, სოფლის მხარდაჭერის პროგრამის ფარგლებში კი, 278 საბავშვო ბაღის რეაბილიტაცია ჩატარდა.

წელს, უკვე მოწონებული პროექტების მიხედვით, რეგიონებში განსახორციელებელი პროექტების ფონდიდან, ქვეყნის მასშტაბით - 81, სოფლის მხარდაჭერის პროგრამის ფარგლებში კი, 334 საბავშვო ბაღის რეაბილიტაციაა დაფინანსებული.