ქარელის რაიონის სოფელ ატოცში საქართველოს პრეზიდენტი და მთავრობის წარმომადგენლები ჩავიდნენ. გიორგი მარგველაშვილი ადგილზე შექმნილ ვითარებას პირადად გაეცნო და მოსახლეობას ესაუბრა.
"პირველ რიგში, რასაც ხელისუფლება გააკეთებს იქნება ის, რომ შეგიმსუბუქებთ იმ დარტყმას, რაც თქვენ, ჩვენ ყველას ერთად მოგვადგა. დარწმუნებული იყავით, რომ არასდროს იქნებით დავიწყებულები'' - განაცხადა გიორგი მარგველაშვილმა.
მოსახლეობას მიმართა რეგიონული განვითარებისა და ინფრასტრუქტურის მინისტრმა დავით ნარმანიამ.
"აქ ყველაზე მეტად გვჭირდება ერთმანეთის გვერდში დგომა. ძალიან მნიშვნელოვანია ის, რომ თქვენ ამ ადგილებს ამაგრებთ და ეს უფრო მეტ სტიმულს გვაძლევს, რომ რესურსები, თუკი სადმე რამე გვექნება, დამატებით გადმოვამისამართოთ'' - განაცხადა დავით ნარმანიამ.
ასევე, დავით ნარმანიამ გიორგი მარგველაშვილს ინფორმაცია მიაწოდა გამყოფი ხაზის მიმდებარე სოფლებში განხორციელებული და მიმდინარე ინფრასტრუქტურული პროექტების შესახებ. პრეზიდენტმა მადლობა გადაუხადა მინისტრს აქტიური მუშაობისთვის.