საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა სამინისტრომ ოთხ ქალაქში: თბილისში, ზუგდიდში, ქუთაისსა და გორში დევნილებს ჰუმანიტარულ ტვირთი გადასცა. ჰუმანიტარული ტვირთი სამინისტრომ კომპანია „ჰიპისგან“ ერთი წლის განმავლობაში უკვე მესამედ მიიღო.
დევნილთათვის განკუთვნილი ჰუმანიტარული ტვირთის შემადგენლობაში შედიოდა: როლატორები (სავარძელები უნარშეზღუდული პირებისათვის), ყავარჯნები, ტანსაცმელი, საყოფაცხოვრებო და ყოველდღიური მოხმარების ნივთები.
გერმანიიდან შემოსული ჰუმანიტარული ტვირთი თბილისში მცხოვრებ სოციალურად დაუცველ და უნარშეზღუდულ დევნილებს, საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა სამინისტროს, სოციალურ საკითხთა და განსახლების სამმართველოს უფროსმა როსტომ კობახიძემ გადასცა.