საქართველოს რეგიონული განვითარებისა და ინფრასტრუქტურის სამინისტროში, დღეს, მიუსაფართა პრობლემების მოგვარებაზე მომუშავე უწყებათაშორისი სამუშაო ჯგუფის მეორე შეხვედრა გაიმართა. შეხვედრაზე განიხილეს მიუსაფართათვის დროებითი თავშესაფრების მოწყობის, მათი გათბობისა და აღჭურვის საკითხები.
„ეს თავშესაფრები გათვალისწინებულია იმ ადამიანებისთვის, ვისაც ღამის გათევა ქუჩაში უწევს,“ - განუცხადა სხდომის დასრულების შემდეგ ჟურნალისტებს დავით ნარმანიამ, -„მათთვის მომზადდება შესაბამისი ადგილი, სადაც სპეციალური კარვები დაიდგმება. მოეწყობა საჭირო საყოფაცხოვრებო პირობები, იქნება გათბობა, მოძრავი სამზარეულო, სამედიცინო მომსახურება. საგანგებო სიტუაციების მართვის ცენტრს ექნება ყველა ინფორმაცია და, მიუსაფარი ადამიანის პოვნის შემთხვევაში, მოქალაქეებს შეეძლებათ მას მიმართონ.“
უკვე მიღებული ინფორმაციის შესაბამისად, დროებითი თავშესაფრის გახსნას არ საჭიროებს ბათუმი. რაც შეეხება სხვა მსხვილ ქალაქებს, წინასწარი მონაცემებით, გასათბობი საშუალებები ქუთაისსა და რუსთავშიც გადაიგზავნება. მინისტრის განცხადებით, თავშესაფრის გარეშე მყოფი ადამიანების ძირითადი საინფორაციო ბაზა არსებობს, თუმცა, მუშაობის პროცესში ისიც დაზუსტდება.
მიუსაფართა პრობლემების მოგვარებაზე მომუშავე უწყებათაშორისი სამუშაო ჯგუფი, ამინდის გაუარესებისა და ტემპერატურის მკვეთრი ვარდნის გამო, პრემიერ-მინისტრის გადაწყვეტილებით, გუშინ შეიქმნა.