საქართველოს რეგიონული განვითარებისა და ინფრასტრუქტურის სამინისტრომ თვითმმართველობის კოდექსი რუსთაველებს გააცნო.
შეხვედრას საქართველოს რეგიონული განვითარებისა და ინფრასტრუქტურის მინისტრის პირველი მოადგილე თენგიზ შერგელაშვილი, მთავრობის კანცელარიის რეგიონებსა და თვითმმართველობებთან ურთიერთობის დეპარტამენტის უფროსი ირაკლი მელაშვილი, ადგილობრივი ხელისუფლებისა და რუსთავის სამოქალაქო საზოგადოების წარმომადგენლები დაესწრნენ.
მიუხედავად იმისა, რომ რუსთავი თვითმმართველი ქალაქის სტატუსს ატარებს, მოქმედი კანონის მიხედვით, მის მაცხოვრებლებს ქალაქის მერის არჩევის უფლება არ აქვთ. ახალი თვითმმართველობის კოდექსის მიხედვით, ქალაქების ხელმძღვანელი რგოლები - მერი და საკრებულო პირდაპირი წესით აირჩევა, მიეცემა მეტი უფლებამოსილებები და ექნება საკუთარი ბიუჯეტი, რომელიც მთლიანად ქალაქის განვითარებას მოხმარდება.
თვითმმართველობის კოდექსი საქართველოს მთავრობამ 30 ოქტომბრის სხდომაზე დაამტკიცა და ის განსახილველად საქართველოს პარლამენტს უახლოეს დღეებში გადაეგზავნება.