თეთნულდის სამთო-სათხილამურო კურორტის მშენებლობა 2014 წელს დაიწყება. პროექტი, რომელიც კომპანია ,,ჯეოგრაფიკმა'' მოამზადა, 6 საბაგიროსა და საერთო ჯამში 25 კმ-იანი ტრასის მოწყობას ითვალისწინებს. ტერიტორია, სადაც საჭირო ინვენტარის ნაწილი უკვე დასაწყობდა, სამინისტრომ ადგილობრივებისგან შეიძინა. 115 კონტეინერი, ანუ 300 დეტალი, უკვე ადგილზეა. დარჩენილი ნაწილები დეკემბრის ბოლომდე, საფრანგეთიდან ჩამოვა.
პროექტის მიხედვით, სამშენებლო სამუშაოებს გაზაფხულიდან, ხელსაყრელი პირობების დადგომისთანავე, ტენდერში გამარჯვებული კომპანია დაიწყებს. სათხილამურო კომპლექსის ასაშენებლად განსაზღვრული ტერიტორია რეგიონული განვითარებისა და ინფრასტრუქტურის მინისტრმა დაათვალიერა და ამ პროექტის შეჩერების შესახებ ინფორმაციას სიცრუე უწოდა.
გეოლოგების თანახმად, თეთნულდის კურორტის სეზონი რეგიონში ყველაზე დიდხანს, მაისის ბოლომდე გაგრძელდება. ახალი სამთო-სათხილამურო კურორტის მშენებლობაში ადგილობრივი მოსახლეობაც ჩაერთვება.