ზაზა კოლელიშვილი

ფილმოგრაფია
ქუჩის დღეები Street Days
წელი: 2010

ფილმის მთავარი გმირი, 45 წლის თბილისელი ნარკომანი, თავისი ცხოვრების ყველაზე მნიშვნელოვანი არჩევანის წინაშე დგას. კორუმპირებული პოლიციელები მისგან მეგობრის შვილის, 16 წლის ბიჭის ჩაშვებას ითხოვენ. თუ იგი დათანხმდება, პოლიციელები მას წამლით და ფულით დაასაჩუქრებენ. თუ უარს ეტყვის, მას 10 წლით გაუშვებენ ციხეში და ამით მისი ცხოვრება პრაქტიკულად დასრულდება.

მედიატორი Mediator
წელი: 2008

დასაწყისში ყველაფერი თითქოს ჩვეულებისამებრ მიმდინარეობს. გვამი, პროზექტურა, პოლიცია და გამომძიებელი, რომელიც საგამოძიებო ექსპერიმენტებითა და ჩვეული კრიმინალისტიკური მეთოდების გამოყენებით მკვლელობის გამოძიებასა და მოკლულის უკანასკნელი დღეების სურათის აღდგენას ცდილობს...
თუმცა ეს რთული აღმოჩნდება. როგორც გაირკვევა, მთავრი მოწმეები ჩვენების მიცემის დროს არ იყვნენ ბოლომდე გულწრფელნი...

ხარება და გოგია
წელი: 1987

თავად ხარაშვილის მოურავი ხარება ჯიბუტი ბატონის უსამართლობას გაექცევა და ტყეში ყაჩაღად გავარდნილი გოგია კენკიაშვილის რაზმს შეუერთდება. ყაჩაღებზე ძებნაა გამოცხადებული. თავადი ანდრონიკაშვილი ხარებას და გოგიას საინტერესო ადამიანებად მიიჩნევს. რუსი მაღალჩინოსანი სტუმრის, ვოლხოვსკის თხოვნით მათ წვეულებაზე მიიპატიჟებს. ტყის ძმები თავადის კაცურ სიტყვას ენდობიან და წვეულებაზე გამოცხადდებიან. შტაბს-კაპიტანი ახვლედიანი რაზმელებზე ნადირობს, მაგრამ მოსახლეობის მხარდაჭერით ტყის ძმები განსაცდელს არაერთხელ დააღწევენ თავს. მოღალატის დახმარებით ახვლედიანი მიზანს მაინც მიაღწევს – ხარებას და გოგიას რაზმს ალყაში მოამწყვდევს და გაანადგურებს.

დედუნა Deduna
წელი: 1985

დედით ობოლი დედუნა, პატარა დიასახლისი, დაცარიელებულ სოფელში მამასთან ერთად ცხოვრობს. დედის კაბებს იცვამს და გზას გასცქერის, თითქოს ვიღაცას ელის. ერთხელ მამა ღამის გასათევად ობოლ ბიჭს მოიყვანს, რომელიც ინტერნატიდან პაპისა და დიდედის სანახავად წამოსულა. ბიჭი მეორე დილით გზას გააგრძელებს, დედუნას კი ფიქრი უჩნდება, თითქოს ამიერიდან მასაც ჰყავს გულშემატკივარი ძმა, რომელიც გაჭირვების დროს მის გვერდით გაჩნდება.

ფესტივალები და პრიზები:
#
გრან-პრი, მანჰეიმის (გფრ) საერთაშორისო კინოფესტივალი (1986).
#
გრან-პრი "ოქროს ანტიგონე", მონპელიეს (საფრანგეთი) საერთაშორისო კინოფესტივალი (1992).