დოდო აბაშიძე

ფილმოგრაფია
ფესვები ფესვები
წელი: 1987

ბედის საძებნელად საფრანგეთში გადახვეწილმა გიორგი ზაქარეიშვილმა სამშობლოში დაბრუნების ოცნება საფლავში თან ჩაიტანა. ბევრს ეცადა, მაგრამ ღარიბსა და უთვისტომოს ყველგან ხელი მოეცარა, მძღოლობას ვერ გასცდა. ბოლოს ფრანგ გოგონაზე დაქორწინდა და სამუდამოდ პარიზში დასახლდა. სამშობლოს ნოსტალგია არასდროს განელებია. გიორგის გარდაცვალების შემდეგ მისმა შვილიშვილმა ბაბუის ფერფლი მშობლიურ სოფელში ჩამოიტანა.

რაჭა ჩემო სიყვარულო Racha My Love
წელი: 1977

ფილმის პრემიერა შედგა 1977 წლის 8 ივლისს. რაჭველი მევენახეები სლოვაკეთის სოფელ რაჭის მევენახეებთან გამოცდილების გასაზიარებლად გაემგზავრებიან. ზაურს იქაური გოგონა, დარინა შეუყვარდება. მოსვენებას არ აძლევს. ცდილობს სიყვარულში დაარწმუნოს. მალე სლოვაკები საპასუხო ვიზიტით საქართველოს ესტუმრებიან. ქართული სტუმართმოყვარეობით და რაჭით მოხიბლულ დარინას, რომელსაც ზაური მართლაც შეუყვარდა, განშორება უჭირს.

დიდი მწვანე ველი The Big Green Valley
წელი: 1976

მწყემსი სოსანა მთელ დღეებს ნახირში ატარებს ველზე. სოფლიდან ცოლ-შვილსაც ჩამოიყვანს. სურს შვილს მწყემსური ცხოვრება შეაყვაროს. გეოლოგები ველზე ნავთობს აღმოაჩენენ. იქ, სადაც ნახირი ძოვს, ჭაბურღილები უნდა აღიმართოს. კოლმეურნეობა მოითხოვს, სოსანამ ჯოგი ფერმას ჩააბაროს. სოსანას პირადი ცხოვრებაც აერევა, ცოლი მიატოვებს. მწყემსი ცვლილებებს ვერ ეგუება, სურს წინაპართა წესით იცხოვროს და მათ სიახლოვეს დაიმარხოს. აღარც ცოლ-შვილი, აღარც საქონელი... სოსანა დათოვლილ ველზე დაკარგულ ნახირს დაეძებს.

მწვერვალი Vertex
წელი: 1976

ქართველი და უცხოელი ალპინისტები მწვერვალს ლაშქრავენ. სპორტსმენებს ამინდი არ სწყალობს. თოვლიან ტრასაზე ექსტრემალური სიტუაცია იქმნება, ყოველი ნაბიჯი საფრთხეს შეიცავს. პროფესიონალიზმი, სიმტკიცე, ერთმანეთის გატანისა და თანადგომის უნარი ფიზიკურ შესაძლებლობაზე მეტად ფასობს. სტიქიასთან ბრძოლაში ინგლისელი ალპინისტი იღუპება.

ვერის უბნის მელოდიები
წელი: 1973

მედროგე პავლეს გოგონები, მარო და თამრო ბალეტის სკოლაში სწავლაზე ოცნებობენ, მაგრამ ღარიბ პავლეს სწავლის ქირის გადახდა არ შეუძლია. მრეცხავი ვარდო გოგონების დახმარებას გადაწყვეტს – მდიდარ ვაჭარს, აღა-გეურქას ხბოს, შეშას და ძვირფას ქურქს მოპარავს, გოგონებს სახლსაც გაუთბობს და "ტანც-კლასის" ფულსაც გადაუხდის. ვარდოს ქურდობისთვის საპყრობილეში ჩასვამენ, მაგრამ მის მხარდასაჭერად მრეცხავები გაიფიცებიან და მალე მთელ ქალაქს ჭუჭყი მოედება. პოლიცმაისტერი იძულებული ხდება ვარდო გაათავისუფლოს და პავლეს გოგონები "ტანც-კლასში" ჩაარიცხინოს.

ფესტივალები და პრიზები:
#
ჟიურის სპეციალური პრიზი, სან–სებასტიანის (ესპანეტი) საერთაშორისო კინოფესტივალი (1977).

ფიროსმანი Pirosmani
წელი: 1969

მირზაანიდან თბილისში ჩამოსულმა თვითნასწავლმა მხატვარმა ნიკო ფიროსმანაშვილმა ერთხანს მატარებლის გამყოლად იმუშავა, მერე დუქანი გახსნა, მაგრამ ვაჭრობას ალღო ვერ აუღო და დუქნების მოხატვას მიჰყო ხელი. ნაშოვნ გროშებს საღებავსა და ჭიქა ღვინოში ხარჯავდა, კაფე-შანტანის ფრანგ მოცეკვავე ქალზე, მარგარიტაზე ოცნებობდა... ერთხელ დუქანში შესული მხატვრები ნიკალას ნამუშევრებით დაინტერესდნენ, კითხვა-კითხვით მიაკვლიეს და მხატვართა საზოგადოების შეკრებაზე მიიწვიეს. გახარებულ ნიკალას პროფესიონალებთან გასაუბრების საშუალება მიეცა, მაგრამ მხატვრებმა ფიროსმანის ხელოვნება არ აღიარეს და გაზეთში მისი კარიკატურა გამოაქვეყნეს. მარტოსულმა, ავადმყოფმა ნიკალამ სიღატაკეში დალია სული.

ფესტივალები და პრიზები:
#
გრან-პრი "ოქროს ჰიუგო" ჩიკაგოს საერთაშორისო კინოფესტივალი (აშშ).
#
ბრიტანეთის კინოინსტიტუტის პრემია.
#
აზოლოს (იტალია), საერთაშორისო კინოფესტივალის პრიზი (1974).

არაჩვეულებრივი გამოფენა არაჩვეულებრივი გამოფენა
წელი: 1968

პროვინციელი მოქანდაკე აგული ერისთავი მასწავლებლის ნაჩუქარი მარმარილოს ქვისგან არაჩვეულებრივი მონუმენტის შექმნაზე ოცნებობს. მაგრამ ფრონტიდან დაბრუნების შემდეგ მხოლოდ დაკვეთით მუშაობს – მიცვალებულთა ბიუსტებს აკეთებს, რადგან დიდი ოჯახი ჰყავს სარჩენი. ერთ დღეს სკოლის ამხანაგებთან შეხვედრიდან შინ მიმავალი შექეიფიანებული აგული ცოლთან ერთად სასაფლაოზე – თავის “პერსონალურ გამოფენაზე” – აღმოჩნდება და სევდანარევი იუმორით აღიარებს, რომ ნიჭი ტყუილუბრალოდ გაფლანგა. ოცნების მარმარილოს კი თავის მოწაფეს გადაულოცავს…

მაცი ხვიტია
წელი: 1966

გადაღებულია ანტონ ფურცელაძის ამავე სახელწოდების რომანის მიხედვით.
სახალხო დღესასწაულზე მაცი ხვიტიას მოხდენილი ჯირითით მოხიბლული დედოფალი გურანდუხტი მას თავის ამალაში სამსახურს შესთავაზებს. მაცი უარს იტყვის და იმავე ღამეს დედოფლის ბრძანებით თურქეთში გასაყიდად მოტაცებულ გოგონებს, მათ შორის თავის სატრფოს, ეკას გაათავისუფლებს. ტყვეებით ვაჭრობის წინააღმდეგ მებრძოლი მაცი გურანდუხტის რისხვას არაერთხელ დაიმსახურებს. იგი თავისი რაზმით თურქეთისკენ მიმავალ ტყვეებით სავსე გემს თავს დაესხმის და ტყვეებს გაათავისუფლებს, შემდეგ კი ეკასთან ერთად გეზს თავისუფალი სვანეთისკენ აიღებს, სადაც საფრთხე აღარ დაემუქრებათ. გურანდუხტის მდევრები გაქცეულებს წამოეწევიან და დახოცავენ.