სამხედრო ცხენები ლონდონის ცენტრში დილის წვრთნების დროს გაიქცნენ, რის შედეგადაც სულ მცირე 4 ადამიანი დაშავდა. ინფორმაციას Sky News-ი ავრცელებს.
არმიის სპიკერის თქმით, ყველა ცხენი უკვე ბანაკში დააბრუნეს.
„დაშავებულია რამდენიმე ადამიანი და ცხენი. მათ შესაბამისი სამედიცინო დახმარება უტარდებათ“, - განაცხადა არმიის წარმომადგენელმა.
მედიაში გავრცელებული ფოტოებიდან და ვიდეოებიდან ჩანს, რომ ერთ-ერთი ცხენი, სავარაუდოდ, სისხლითაა დასვრილი.
ლონდონის სასწრაფო დახმარების სამსახურმა განაცხადა, რომ სამი ცალკეული ინციდენტის შედეგად საავადმყოფოში ჯამში ოთხი ადამიანი გადაიყვანეს. მათივე თქმით, ბუკინგემის სასახლის გზაზე მომხდარი ინციდენტის დროს ერთ-ერთი ცხენიდან ადამიანი გადმოვარდა.
გაქცეული ერთ-ერთი ცხენი დაეჯახა გაჩერებულ ორსართულიან ტურისტულ ავტობუსს, რის შედეგადაც ტრანსპორტის საქარე მინა ჩაიმსხვრა. დაზიანდა ერთ-ერთი ტაქსისტის მანქანაც.

გამოიწერეთ გვერდი