#ახალიამბები
„საერთაშორისო რესპუბლიკური ინსტიტუტი“ საზოგადოებრივი აზრის კვლევის მორიგ შედეგებს აქვეყნებს. „აირაის“ ცნობით, ამ კვირას რომ საპარლამენტო არჩევნები ტარდებოდეს, „ქართულ ოცნებას“ ხმას 25% მისცემდა, ნაციონალურ მოძრაობას კი - 12%. ხმათა უმრავლესობით მესამე ადგილს გახარიას პარტია „საქართველოსთვის“ იკავებს 3 პროცენტით. მას მოსდევენ „გირჩი - მეტი თავისუფლება“, „სტრატეგია აღმაშენებელი“, „დროა“, „ლეიბორისტული პარტია“ და სხვები. მოქალაქეთა 6 პროცენტის თქმით, ხმას არავის მისცემენ, 7-მა პროცენტმა კი კითხვაზე პასუხის გაცემისგან თავი შეიკავა. ინსტიტუტის კვლევითვე დგინდება, რომ მოსახლეობის 72% სურს, მომავალ არჩევნებში ახალი პოლიტიკური პარტიები იხილოს. „აირაის“ დაკვეთით კვლევა მიმდინარე წლის 13 სექტემბრიდან 2 ოქტომბრამდე პერიოდში ჩატარდა. საველე სამუშაოები კომპანია „აიფიემმა“ ჩაატარა. მონაცემები, პირისპირ ინტერვიუს მეთოდით რესპონდენტთა სახლებში შეგროვდა. მრავალეტაპიანი შემთხვევითი შერჩევის მეთოდით გამოიკითხა 1500 სრულწლოვანი მოქალაქე. ცდომილების ზღვარი +/- 2.5%-ია.