#ახალიამბები
სტატისტიკის ეროვნული სამსახური ქვეყანაში ქალთა მიმართ ძალადობის კვლევას ჩაატარებს. საველე სამუშაოები 2022 წლის ოქტომბერ-ნოემბრის პერიოდში იგეგმება და მასში ქვეყნის მასშტაბით 4400 რესპონდენტი მიიღებს მონაწილეობას. გამოკვლევის მიზანი 15-69 წლის ასაკის ქალებისა და კაცების შესახებ ისეთი ინფორმაციის შეგროვებაა, როგორიცაა: ფინანსური მდგომარეობა და სამუშაოსთან დაკავშირებული ასპექტები, ძალადობასთან დაკავშირებული დაზიანებები, დახმარების ძიებასთან დაკავშირებული ქცევები, სექსუალური შევიწროება, ადევნება, სოციალური ნორმები და შეხედულებები. გამოკვლევის შედეგები 2023 წელს იქნება ხელმისაწვდომი. იგივე კვლევა, პირველად, 2017 წელს ჩატარდა, რომლის შედეგები საქსტატის ვებ-გვერდზეა ხელმისაწვდომი. პროექტი გაეროს ქალთა ორგანიზაციის ფინანსური და ტექნიკური მხარდაჭერით განხორციელდება.