#ახალიამბები
მართავს თუ არა ბათუმის მერის Facebook-გვერდს აჭარის მთავრობის ადმინისტრაცია? - ამ სათაურით, კვლევას „საერთაშორისო გამჭვირვალობა საქართველო“ აქვეყნებს. ორგანიზაციის ცნობით, სოციალურ ქსელში, არჩილ ჩიქოვანის საჯარო გვერდის მასალების რეკლამირებაში აჭარის მთავრობის საერთაშორისო ურთიერთობათა და პროტოკოლის დეპარტამენტის უფროსია ჩართული. მესამე სექტორის ინფორმაციითვე, გოგი ფუტკარაძე, Facebook-ში, თორნიკე რიჟვაძის პოსტების რეკლამირების პროცესშიც მონაწილეობს. ორგანიზაციის შეფასებით, აჭარის მთავრობის ადმინისტრაციის წარმომადგენლის ჩართვა თვითმმართველობის საკითხებში პრობლემურია. მალხაზ ჭკადუას თქმით, გაუმჭვირვალეა საქმიანობის დაფინანსების მექანიზმი და წყაროები. Facebook-ის მიერ საჯაროდ გამოქვენებული ცნობების თანახმად, არჩილ ჩიქოვანის გვერდიდან სხვადასხვა ინფორმაცია 180-ჯერ დაარეკლამეს. ჯამში, გვერდზე გამოქვეყნებული ინფორმაციის რეკლამირებისთვის 3,200 აშშ დოლარამდე დაიხარჯა. ეს ყველაფერი კი, იმ ფონზე, როცა აჭარის მთავრობის ადმინისტრაცია და ბათუმის მერია ოფიციალურ წერილებში აცხადებენ, რომ სოციალურ ქსელებში თანამდებობის პირების ანგარიშების რეკლამისთვის თანხა არ დაუხარჯავთ. ბათუმის მერიაში ბრალდებას სიტყვიერად უპასუხეს. უწყების განმარტებით, გოგი ფუტკარაძემ მათ ტექნიკური დახმარება გაუწია.