#ახალიამბები

მოსამართლეები საერთო სასამართლოების შესახებ კანონში მიღებულ ცვლილებებს საკონსტიტუციო სასამართლოში ასაჩივრებენ. დავის საგანი კანონში რამდენიმე ნორმის კონსტიტუციურობაა, მათ შორისაა, გამოხატვის თავისუფლება. მოსარჩელე მხარის განცხადებით, გასაჩივრებული ნორმით მათ ეზღუდებათ სოციალურ ქსელში რუსეთის მიერ უკრაინისა თუ საქართველოს ოკუპაციისა და ომის საწინააღმდეგო გამოხატვა.

მოსამართლეები დავობენ მივლებასთან დაკავშირებულ ცვლილებებზეც. კერძოდ, საქმე ეხება საერთო სასამართლოების შესახებ კანონში შესულ ცვლილებას, რომლის თანახმადაც, იუსტიციის საბჭოს მოსამართლეთა ნების საწინააღმდეგოდ, იძულებით, მათი აზრის გაზიარების გარეშე, შეუძლია მოსამართლე ერთი რეგიონიდან მეორე რეგიონში ხანგრძლივად, სამსახურეობრივი საქმიანობის შესასრულებლად მიავლინოს. სარჩელის დასაბუთებაში მომჩივანი მოსამართლეები აღნიშნულ ცვლილებებს "სადამსჯელო ღონისძიებად" მიიჩნევენ და აღნიშნავენ, რომ მისი მიზანი არასასურველი პოზიციების გამჟღერებელ, "ურჩ" მოსამართლეებზე გავლენის მოხდენაა.