#ახალიამბები
საქსტატის შეფასებით, 2022 წლის თებერვალში, წინა წლის შესაბამის პერიოდთან შედარებით, საქართველოს ეკონომიკა 14.6%-ით გაიზარდა. იანვარში ეს მონაცემი 18% იყო, ხოლო იანვარ-თებერვლის ეკონომიკური ზრდის საშუალო მაჩვენებელი 16.3%-ია. 2021 წელი ქვეყანამ მთლიანი შიდა პროდუქტის 10.4%-იანი ზრდით დაასრულა. საქართველოს ეკონომიკის ორნიშნა ზრდის მიზეზად პანდემიურ პერიოდში დაფიქსირებული შემცირება დასახელდა. ამ მოვლენას საბაზისო ეფექტი ეწოდება, როცა გასული წლის ვარდნა წლევანდელი მონაცემების ზრდას უწყობს ხელს. რაც შეეხება 2022 წელს, საქართველოს ეროვნულმა ბანკმა ეკონომიკური ზრდის პროგნოზი შეამცირა. განცხადებაში მიზეზად რუსეთ-უკრაინის ომის გამო მსოფლიო ეკონომიკის წინაშე მდგარი გამოწვევებია დასახელებული.