#ახალიამბები
82 წლის ქალი მოკლეს, შემდეგ კი კვალის დაფარვის მიზნით, ცხედარი დაწვეს. შემთხვევა თბილისში მოხდა. გამოძიებით დადგინდა, რომ ბრალდებულმა ნათესავ ქალს მისსავე საცხოვრებელ სახლში, ბასრი საგნით სხეულზე დაზიანება მიაყენა, რის შედეგადაც იგი ადგილზე გარდაიცვალა. მძიმე დანაშაულის შემდეგ, დაკავებულმა ბინიდან ტელევიზორი წაიღო და ლომბარდში ჩაბარება სცადა, თუმცა, ვერ შეძლო. იგი კვლავ შემთხვევის ადგილზე დაბრუნდა, ცხედარს ცეცხლი მოუკიდა და მიიმალა. პოლიციამ, ეჭვმიტანილი მომხდარიდან რამდენიმე საათში დააკავა. გამოძიება სისხლის სამართლის კოდექსის 109-ე მუხლის მე-3 ნაწილის „გ“ ქვეპუნქტით მიმდინარეობს, რაც ანგარებით ჩადენილ განზრახ მკვლელობას გულისხმობს. დანაშაული 16-დან 20 წლამდე ან უვადო თავისუფლების აღკვეთას ითვალისწინებს.