მოსამართლე, თამარ ბეჟანეიშვილმა, ამ განცხადებით, ბათუმში, 26 მაისის ქუჩაზე საცხოვრებელი კორპუსის ნგრევის გამო დაკავებულ სამივე პირს აღკვეთი ღონსძიების სახით პატიმრობა შეუფარდა. ფაქტზე დაკავებულია 3 პირი - ბინის მეპატრონე ზაურ ბუდაგოვი და 2 მუშა, მამა-შვილი სურმანიძეები. პროკურატურა, მათ, სამშენებლო სამუშაოების წარმოებისას უსაფრთხოების წესის დარღვევას ედავება, რამაც ადამიანების გარდაცვალება და მძიმე შედეგი გამოიწვია. დაცვის მხარე სასამართლოს გადაწყვეტილების გასაჩივრებას აპირებს და აღნიშნავს, რომ პროკურატურის ბრალდება მანამ უსაფუძვლოა, სანამ აღნიშნულ თემაზე ექსპერტიზის დასკვნა არ დაიდება.
სასამართლო პროცესის პარალელურად, ბათუმში, მთელი დღის განმავლობაში, სამოქალაქო პანაშვიდი მიმდინარეობდა. 26 მაისის ქუჩაზე დატრიალებული ტრაგედიის გამო, 11 ოქტომბერი გლოვის დღედ გამოცხადდა, მთელი ქვეყნის მასშტაბით, დაეშვა სახელმწიფო დროშები. საქართველო ნგრევის შედეგად დაღუპულ 9 ადამიანს, მათ შორის, სამ არასრულწლვანს გლოვობს. სამოქალაქო პანაშვიდი ღვთისმშობლის შობის ტაძარში აღევლინა. გარდაცვლილებს ოჯახის წევრებთან ერთად მთავრობის წარმომადგენლებიც გამოემშვიდობნენ. მათ შორის პრემიერ-მინისტრი, ირაკლი ღარიბაშვილიც.
კორპუსის ნანგრევებთან, სადაც 2 დღის წინ მაშველები ადამიანების გადარჩენას ცდილობდნენ, ახლა ხალხის ნაკადი არ წყდება. ისინი სანთლებითა და სათამაშოებით დაღუპულთა სულებს პატივს მიაგებენ. მოქალაქეების თქმით, ის უბედური შემთხვევა, რაც 8 ოქტომბერს დატრიალდა, ყველასთვის ცუდ მოგონებად და შავ ლაქად დარჩება.
8 ოქტომბერს, ბათუმში, შვიდ სართულიანი კორპუსის ნანგრევებში ჯამში 10 ადამიანი მოყვა, მათგან ერთადერთი გადარჩენილი, ზვიად თავდგირიძე, ამჟამად კლინიკაშია და მისი ჯანმრთელობის მდგომარეობა სტაბილურად მძიმეა.