საქართველო, განსაკუთრებული გეოგრაფიული მდებარეობისა და მრავალფეროვანი კლიმატური პირობების გამო, კლიმატური ცვლილებებისგან საკმაოდ დაუცველია, - ამის შესახებ საქართველოს პრემიერ-მინისტრმა მეოთხე ინტერაქტიულ დიალოგში - „ჩვენი პლანეტის დაცვა და კლიმატურ ცვლილებებთან ბრძოლა“ განაცხადა, რომელიც 2015 წლის გაეროს მდგრადი განვითარების სამიტის ფარგლებში გაიმართა.
მთავრობის მეთაურმა სიტყვით გამოსვლისას კლიმატურ ცვლილებებთან ბრძოლას 21-ე საუკუნის ერთ-ერთი ყველაზე მნიშვნელოვანი გამოწვევა უწოდა და თბილისში ივნისში მომხდარ სტიქიაზე ისაუბრა.
„წელს ზაფხულში ჩვენს დედაქალაქში, თბილისში, დატრიალდა სტიქიური უბედურება, წყალმოვარდნა, რომელმაც სავალალო შედეგები იქონია ადამიანებსა და ინფრასტრუქტურაზე. ეს ტრაგედია კიდევ ერთი მიზეზია, თუ რატომ უნდა გავაათმაგოთ ჩვენი ბრძოლა კლიმატურ ცვლილებებთან“, - განაცხადა ირაკლი ღარიბაშვილმა და აღნიშნა, რომ დღეს მსოფლიოს წინაშე დგას გარემოსდაცვითი გამოწვევები, რომლებიც საფრთხეს უქმნის სასმელი წყლის ხარისხს, აბინძურებს ბუნებრივ რესურსებს და უზარმაზარ ზიანს აყენებს კერძო პირებისა და ინდუსტრიის მთელი დარგების საკუთრებას.
მთავრობის მეთაურის თქმით, ე.წ მწვანე განვითარებისადმი საქართველოს ერთგულება ურყევია.
„ჩვენ ამას ვახორციელებთ მთელი საქართველოს მასშტაბით დაბალი ნახშირბადის გამოყოფის ტექნოლოგიებში ინვესტიციების წახალისების გზით, რის შედეგადაც შესაბამისი რაიონების მოსახლეობა დაცული იქნება ზიანისგან. შესაბამისად, საქართველო დგამს ნაბიჯებს, რათა კლიმატური რისკები და მათგან დაცულობის უზრუნველყოფა გათვალისწინებული იყოს განვითარების დაგეგმარებასა და განხორციელებაში“, - აღნიშნა ირაკლი ღარიბაშვილმა.