ჯანდაცვის მინისტრი ეკატერინე ტიკარაძის განცხადებით, მეოთხე პაციენტი რომელსაც კორონავირუსი დაუდასტურდა რეკომენდაციით თვითიზოლაციაში იმყოფებოდა და სამსახურში არ წასულა, რაც არსებულ სიტუაციას გაცილებით ამარტივებს. მინისტრის თქმით, უკვე მოძიებულია მასთან კონტაქტში მყოფი პირები და ისინი დეტალურად იქნებიან გამოკვლეული.
ეკატერინე ტიკარაძემ აღნიშნა, რომ კორონავირუსი მსოფლიო გამოწვევაა, თუმცა ამ გამოწვევას საქართველოს ჯანდაცვის სისტემა საკმაოდ კარგად ართმევს თავს.
„ჩვენ ღრმად ვართ დარწმუნებული, რომ შეგვიძლია სიტუაციის კონტროლი და ყველა ის შემთხვევა, რომელიც გამოვლენილი იყო, იყო გამოვლენილი ჩვენი აქტიური მუშაობით, რაც ნამდვილად არის ძალიან ეფექტური. მე ამისთვის, პირველ რიგში, მადლობას ვუხდი ყველა იმ პირს ვინც მუშაობს საზღვარზე, არიან ესენი მესაზღვრეები თუ ჩვენი პერსონალი, რომელიც ადგილზე გვყავს მივლენილი“, - აღნიშნა ეკატერინე ტიკარაძემ.
მისივე თქმით, ყველა რეკომენდაცია, რომელსაც ჯანდაცვის სამინისტრო გასცემს, არის მსოფლიო ჯანდაცვის ორგანიზაციაზე დაყრდნობით.
„საქართველო არის ერთ-ერთი მოწინავე ქვეყანა, სადაც ჩვენ დროულად ვიწყებთ ყველა პრევენციულ ღონისძიებებს, რაშიც მნიშვნელოვნად ჩამოგვრჩებიან ევროპის ქვეყნები, ვინაიდან მათ ეს ვირუსი არ აღიქვეს შესაბამისად და მათთან გავრცელება გაცილებით მეტია. ჩვენ ვაპირებთ, რომ ადგილზე გავეცნოთ ყველა სიტუაციას და ჯანდაცვის უწყება იქნება პირადად ჩართული ყველა ღონისძიებაში. რაც შეეხება დასუფთავების საქმიანობებს, ჩვენ შევისწავლით დეტალურად და ვახორციელებთ მონიტორინგს, ვიძლევით შემდეგ დამატებით რეკომენდაციებს ან მკაცრ გაფრთხილებებს“, – განაცხადა ეკატერინე ტიკარაძემ.