უბედური შემთხვევა ქედაში - კარიერის აფეთქებისას 6 წლის ბავშვი დაიღუპა. არსებული ინფორმაციით, მოზარდი მიმდებარე ტერიტორიაზე, 100 მეტრის რადიუსში საცხოვრებელი სახლის ეზოში იმყოფებოდა. თვითმხილველების განცხადებით, ბავშვს კარიერის დამუშავებისას ქვა დაეცა. შემთხვევა ქედაში, სოფელ დოლოგანში ჭინკაძეების დასახლებაში მოხდა.მომხდარზე პოლიციამ გამოძიება დაიწყო.'ცნობისთვის დოლოგნის ცენტრში კარიერია, სადაც ქვის მოპოვება ხდება. კომპანიის წარმომადგენლები, რომლებიც სოფელში ინერტულ მასალას მოიპოვებდნენ გამოკითხვაზე დაიბარეს. თავად დაღუპული ბავშვის ახლობლები კარიერის მწარმოებელ კომპანიას უსაფრთხოების ნორმების დარღვევაში ადანაშაულებენ.
დაღუპულის ბიძა ამბობს, რომ სოფელი მოსალოდნელი აფეთქების შესახებ გაფრთხილებული იყო, თუმცა აფეთქება მანამდე მოხდა, ვიდრე კომპანია დაპირებულ სატელეფონო ზარს განახორციელებდა. როგორც თვითმხილველები ამბობენ, აფეთქება იმდენად მოულოდნელად მოხდა, რომ ბავშვი შიშისგან ეზოში გავარდა, რა დროსაც მას თავში ლოდის ნატეხი მოხვდა და ადგილზე გარდაიცვალა.